Ўзбекистонда 2021 йил январь—сентябрь ойларида бизнес-омбудсманга мурожаат қилган тадбиркорлар сони икки бараварга кўпайди. Бу ҳақда Бизнес-омбудсман бўлим бошлиғи Нозима Саидалиева 1 ноябрь куни АОКАда бўлиб ўтган брифингда маълум қилди.
Қайд этилишича, 2021 йилнинг 9 ойида бизнес-омбудсман томонидан тадбиркорларнинг 5 мингдан ортиқ мурожаати ўрганилган. Бу кўрсаткич ўтган йилнинг мос даврига қараганда икки бараварга кўп.
Таъкидланишича, кўриб чиқилган мурожаатларнинг деярли 3 мингтаси қаноатлантирилган. Қолганлари юзасидан тушунтириш берилган.
Бизнес-омбудсман томонидан 9 ойда тадбиркорлар манфаатида судларга 28 миллиард сўмлик даъво аризалар киритилган. 2021 йил маъмурий жавобгарликка тортилганлар сони кескин кўпайган ва ўтган йилга нисбатан 740 нафарга ошган.
Бизнес-омбудсманга энг кўп мурожаат Тошкент шаҳридан келиб тушган — 643 та. Шунингдек, Тошкент вилоятидан 583 та, Қорақалпоғистондан 540 та мурожаат йўлланган. Соҳалар кесимида ер масаласи (1179) ва кредит ажратилиши (1119) тадбиркорларни энг қийнаётган муаммолар сифатида қайд этилган.
Эслатиб ўтамиз, Ўзбекистонда 2017—2021 йилларда олиб борилган ислоҳотлар ҳақида веб-сайт ишга туширилганди. Ундаги маълумотларга кўра, шу йиллар мобайнида бизнес-омбудсманга 13,4 минг ариза келиб тушган. Натижада 930 масъул шахс интизомий, 1513 таси маъмурий жавобгарликка тортилган. Давлат ва назорат органларининг 1034 ноқонуний қарорлари бекор қилиниб, суд орқали тадбиркорлик субъектлари фойдасига 95,1 миллиард сўм ундирилган.
Мавзуга доир:
- Наманганда 2020 йилда бизнес-омбудсман вакиллари томонидан судларга киритилган даъво аризаларининг барчаси тадбиркорлар фойдасига ҳал этилди
- 2020 йилда Президент қабулхоналарига 1 миллиондан ортиқ мурожаат келиб тушган
- Ўзбекистон Молия вазирлигига келиб тушган мурожаатларнинг 60 фоизида пенсия миқдорини ошириш сўралган
Изоҳ (0)