O‘zbekiston Respublikasi Prezidenti o‘z chiqishlarida qishloq xo‘jaligini ilmiy asosda yo‘lga qo‘yish, soha mutaxassislarining bilim va ko‘nikmalarini muntazam oshirib borish kabi vazifalarni takror va takror ta’kidlab kelmoqda.
Bunda qishloq xo‘jaligida hosildorlik va samaradorlikni keskin oshirish hamda har gektar yerdan olinadigan daromadning oshirib borilishiga ahamiyat qaratilmoqda.
Shu maqsadda “Bilimlar zamini” deb nomlangan o‘quv kursi “Agrobank” ATB hamda Fermer, dehqon xo‘jaliklari va tomorqa yer egalari kengashi tomonidan tashkil etilmoqda.
Mazkur o‘quv kursi respublika bo‘ylab 80 mingga yaqin fermer xo‘jaliklarini qamrab olishni rejalashtirgan bo‘lib, fermerlar qishloq xo‘jaligi sohasidagi yangiliklar, zamonaviy texnika va texnologiyalar, innovatsion yechimlar, amaliyotda uchraydigan muammolarni bartaraf etishda mahalliy va xorijiy yondashuvlar bo‘yicha dastlabki bilim hamda ko‘nikmalarga ega bo‘lishdi.
Loyihaga O‘zbekiston Respublikasi Qishloq xo‘jaligi vazirligi, O‘zbekiston Respublikasi Suv xo‘jaligi vazirligi, sohadagi oliy o‘quv yurtlari va ilmiy tadqiqot institutlari, Shveysariya taraqqiyot va hamkorlik agentligining O‘zbekistonda suv resurslarini boshqarish bo‘yicha milliy loyihasi, qishloq xo‘jaligi sohasida xalqaro tashkilotlar hamkorlik qilmoqda.
Mazkur o‘quv kursi ko‘lami bo‘yicha mamlakatimizdagi eng yirik loyiha bo‘lib, bir vaqtning o‘zida respublikaning 13 ta hududida 100 dan ortiq yuqori malakali trenerlar jalb etgan holda, 2021-yilning noyabridan 2022-yilning yakuniga qadar tashkil etiladi. Har bir kurs davomida 650 nafargacha tinglovchining malakasini oshirishga erishiladi.
Tinglovchilarga qishloq xo‘jaligini rivojlantirish strategiyasi, sohada innovatsion texnologiyalar va hosildorlikni hamda tuproq unumdorligini oshirishning zamonaviy usullari, zararkunandalarga qarshi kurashish, mahsulotlarni yig‘ib olish, saqlash, ishlov berish va sotish kabi mavzularda bilim beriladi.
Shuningdek, tinglovchilar xorij tajribasiga ega mutaxassislar tomonidan o‘tiladigan master-klasslarda qatnashish imkoniyatiga ega bo‘lishadi. Kurs yakunida ularga maxsus sertifikat hamda esdalik sovg‘alari topshiriladi.
Kursning boshlanish sanasi: 25-noyabr
Ro‘yxatdan o‘tish uchun: fermerlarkursi_bot
Bizni ijtimoiy tarmoqlarda kuzatib boring:
Reklama huquqi asosida.
Izoh (0)