Olmaliq kon-metallurgiya kombinati tarkibidagi Angren quvur zavodi yuqori sifatli mis quvurlar ishlab chiqaruvchi korxona sifatida ichki va tashqi bozorda allaqachon o‘z o‘rni va nufuzini topishga ulgurgan.
Turli diametrga ega mis quvurlarni ishlab chiqarishga ixtisoslashtirilgan zamonaviy zavod 2013-yilda Toshkent viloyati, Angren maxsus industrial zonasida tashkil etilgan. Korxonada xalqaro talablarga javob beradigan turli diametrli mis quvurlar ishlab chiqariladi. Zavodning loyiha quvvati yiliga 5000—8000 tonnani tashkil etadi. Asosiy xomashyo Olmaliq kon-metallurgiya kombinati tomonidan yetkazib beriladi. Zavodda ishlab chiqarilayotgan mis quvurlar kundalik hayotda, ishlab chiqarishda, qurilish ishlarida, suv quvurlari esa isitish kommunikatsiyalarini o‘tkazishda, iqlim uskunalarini o‘rnatishda keng qo‘llaniladi. Bundan tashqari, mis quvurlaridan kemasozlik va energetika sohalarida ham keng foydalaniladi.
Zavodimiz mis quvurlarini ishlab chiqarish hajmiga ko‘ra, Markaziy Osiyodagi eng yirik korxona hisoblanadi. Jamoamiz joriy yilning oktabr oyiga qadar 4500 tonnadan ortiq mis quvurlarini ishlab chiqarib, belgilangan rejani ortig‘i bilan bajarishga erishdi. Rejaga ko‘ra, 2600 tonna mahsulot xorijlik xaridorlarga yuborilishi kerak edi. Jumladan, Qozog‘iston, Rossiya, Ozarbayjon, Qirg‘iziston, Turkiya, Bolgariya va Belarus kabi mamlakatlarga 41 million dollarlik mahsulot eksport qilindi. Kelgusi yildan boshlab, Misr va Germaniya kabi davlatlarga ham o‘z mahsulotimizni yetkazib berishni maqsad qilganmiz, — deya ta’kidladi Angren quvur zavodi direktori Eryigit Sulaymonov.
Mahsulotlarning yuqori sifatini ta’minlash maqsadida ishlab chiqarish jarayonida zamonaviy texnologiyalardan foydalaniladi. Korxona o‘z mahsulotlarini ichki va tashqi bozorga muvaffaqiyatli sotmoqda. Ishlab chiqarilgan mis quvurlari asosan eksportga yo‘naltirilgan. Asosiy iste’molchilar MDH davlatlari, Turkiya va Sharqiy Yevropa mamlakatlari hisoblanadi.
Korxona jamoasi bugungi kunda erishgan yutuqlari bilan qanoatlanib qolmay, bundanda ulkan natijalar sari intilishni maqsad qilgan. Xususan, kelgusi yilda mahsulotlar xilma-xilligini kengaytirish, yangi turdagi mahsulotlarni ishlab chiqarish va yangi bozorlarga chiqish hisobiga eksport hajmini sezilarli darajada oshirish, hamda eksport geografiyasini kengaytirish rejalashtirilgan.
Joriy yilning 28-iyun kuni O‘zbekiston Respublikasi Prezidenti Shavkat Mirziyoyev tomonidan mis ishlab chiqarishni yanada rivojlantirish hamda sanoat klasterini tashkil etish masalalari yuzasidan yig‘ilish o‘tkazilib, unda sohaga oid bir qator muhim vazifalar belgilab berilgan edi. Yig‘ilishda ta’kidlanganidek, hozirgi kunda misdan keladigan daromad 2,5 milliard dollarni tashkil etmoqda. Ammo ushbu ko‘rsatkichni 7−8 milliard dollarga yetkazish mumkin. Shuningdek, xalqaro ekspertlarning fikricha, elektromobillar, elektrotexnika va qayta tiklanuvchi energiya sohalarining rivojlanishi evaziga 2030-yilga borib dunyoda misga bo‘lgan talab 40 foizga oshishi kutilmoqda.
Angren quvur zavodi tomonidan ushbu yo‘nalishda ham bir qator ishlar amalga oshirilmoqda. Jumladan, Olmaliq kon-metallurgiya kombinatida mis sanoati klasterini rivojlantirish xizmati tashkil etilgan bo‘lib, zavod bilan hamkorlikda bir qator loyihalarni ishlab chiqmoqda va ularni izchil amalga oshirishni maqsad qilgan.
Ma’lumot sheriklik huquqi asosida tayyorlandi.
Izoh (0)