Braziliya prezidenti Jair Bolsonaruning qo‘riqchilari prezidentning G20 sammiti doirasida Rimga safarini yoritayotgan braziliyalik jurnalistlarga nisbatan zo‘ravonlik qo‘llagani aytilmoqda. Bu haqda Reuters xabar berdi.
Agentlikning ta’kidlashicha, Bolsonaru matbuot bilan dushmanlik munosabatlariga ega. U anchadan buyon jurnalistlarni soxta xabarlar chop etishda va unga nisbatan adolatsiz munosabatda bo‘lishda ayblab keladi.
Xabarga ko‘ra, jurnalistlarga hujum prezident Italiya poytaxti ko‘chalarini kezib, milliy terma jamoa libosidagi ayrim braziliyaliklar bilan uchrashgan paytda sodir bo‘lgan. U Braziliyadagi koronavirus inqirozini hal qilishda xatoliklarga yo‘l qo‘ygani uchun qattiq tanqid qilingan va ba’zilar uning harakatlarini “genotsid” deb atagan.
Jurnalistlarning videotasvirlarda tansoqchilar jurnalistlarni ko‘chaga itarib yuborayotgani, Bolsonaru esa o‘z tarafdorlari bilan selfi tushib, suhbatlashayotganini ko‘rish mumkin.
Globo telekanali jurnalisti Leonardo Monteyro Bolsonarudan nega G20 ning birorta tadbirida qatnashmagani haqida so‘raganidan so‘ng tansoqchilardan biri uning qorniga musht tushirib, orqaga surib tashlagan, deb yozadi Deutsche Welle.
“Globo o‘z muxbiri Leonardo Monteyro va Rimdagi boshqa hamkasblariga nisbatan qilingan tajovuzni keskin qoralaydi va javobgarlikni to‘liq baholashni talab qiladi”, — deyiladi bayonotda.
Braziliyaning Folha de S. Paulo gazetasining Yevropadagi muxbiri Ana Estela De Souza zobitlar “uni turtib, qo‘pol muomala qilgan”ini aytdi. “Bunga chidab bo‘lmaydi. Biz shikoyat qilamiz. 20 yil davomida men prezidentlik safarlari va shunga o‘xshash voqealarni yoritganman, hech qachon men bilan bunday voqea sodir bo‘lmagan”, — deydi u.
Xavfsizlik xodimlarining braziliyalik yoki italiyalik ekani noma’lum. Globo ma’lumotlariga ko‘ra, Bolsonaruning xavfsizligini ta’minlash vazifasi italiyaliklarga yuklangan.
Avvalroq Braziliya senatorlari koronavirus bilan bog‘liq vaziyat sabab prezident Bolsonaruga qarshi ayblovni ma’qullagan edi. Shuningdek, Braziliya prezidenti Amazoniya o‘rmonlarini yo‘q qilishdagi ishtiroki bilan insoniyatga qarshi jinoyatlarda ayblanmoqda.
Izoh (0)