Amerika razvedka hamjamiyatining hisobotida keltirilgan koronavirusning kelib chiqishi haqidagi xulosalar ishonchsiz va ilmiy asosga ega emas. Bu haqda Xitoy Tashqi ishlar vazirligi matbuot kotibi Van Venbinga tayanib, “Interfaks” xabar berdi.
30-oktabr kuni e’lon qilingan hisobotda aytilishicha, AQSh razvedka hamjamiyati COVID-19 kelib chiqishi haqidagi ikkita farazga bir ovozdan bo‘lmasa-da, haligacha ishonmoqda: virusning hayvondan insonga tabiiy yo‘l orqali yuqishi yoki “Uxandagi laboratoriya ishi bilan bog‘liq hodisa”.
Shuningdek, hisobotda koronavirusning kelib chiqishi haqida yakuniy xulosaga kelish uchun Xitoyning yordami zarurligi aytiladi.
“Biroq Pekin tekshiruvga to‘sqinlik qilishda davom etmoqda, ma’lumotni oshkor qilishdan qochib, aybni boshqa davlatlar, jumladan, AQShga yuklamoqda”, — deyiladi hisobotda.
Bunga javoban Van Venbin shunday dedi: “Ming marta takrorlangan yolg‘on baribir yolg‘onligicha qoladi. Ushbu hisobot necha marta nashr etilmasin yoki qancha versiyalar to‘qib chiqarilmasin, u ilmiy asosga ega bo‘lmagan, ishonchsiz, butunlay siyosiy xususiyatga ega va yolg‘on xabarlarning mohiyatini o‘zgartirmaydi”.
Uning ta’kidlashicha, virusning kelib chiqishini o‘rganish “jiddiy va murakkab ilmiy muammo bo‘lib, tadqiqotni faqat butun dunyo olimlari hamkorlik asosida olib borishi kerak va faqat ular buni amalga oshira oladi”.
Diplomatning so‘zlariga ko‘ra, Amerika tomoni “siyosiy manipulyatsiyaga berilib ketgan”, bu epidemiyaga qarshi kurashda global ilmiy hamkorlikka faqat zarar yetkazishi va bundan ham ko‘proq insonlarning qurbon bo‘lishiga olib kelishi mumkin.
AQSh Milliy razvedka boshqarmasining bundan avvalgi hisoboti avgust oxirida e’lon qilingandi. Unda aytilishicha, koronavirus Xitoy tomonidan biologik qurol sifatida yaratilmagan va xitoylik amaldorlar SARS-CoV-2 ning ilk o‘choqlari paydo bo‘lmagunga qadar virus haqida ma’lumotga ega bo‘lmagan. Biroq unda virus Uxan laboratoriyasidan “sizib chiqqan” degan fikr istisno qilinmagan.
Xitoy bu hisobotni ilmiy jihatdan noaniq deb topgandi. Unga ko‘ra, AQSh razvedkasi o‘z xulosalarini XXRning “aybdorligi haqidagi taxminga” asoslagan. Pekin Vashingtonni “koronavirusning kelib chiqishini siyosiylashtirishni to‘xtatishga” chaqirdi. Xitoylik olimlar SARS-CoV-2 qanday paydo bo‘lgani to‘g‘risida o‘z tadqiqotlarini olib bordi va uning sun’iy yaratilgani ehtimoldan yiroq degan xulosaga keldi.
Izoh (0)