AQSh prezidenti Jo Bayden Italiya poytaxti Rimdagi G20 (“katta yigirmatalik davlatlar”) sammitida Rossiya prezidenti Vladimir Putin va Xitoy rahbari Si Szinpin ishtirok etmaganidan hafsalasi pir bo‘lganini ma’lum qildi. Bu haqda u sammit yakunida bo‘lib o‘tgan matbuot anjumanida aytib o‘tdi.
“Iqlim o‘zgarishi bo‘yicha majburiyatlarni muhokama qilishda Rossiyaning, nafaqat Rossiya, balki Xitoyning ham ishtirok etmagani hafsalani pir qiladi”, — dedi u.
Shu tariqa Bayden jurnalistlarga “ba’zi nodavlat tashkilotlar”ning G20 iqlim kelishuvlari ishonchni uyg‘otmasligi haqidagi bayonotlariga fikr bildirdi. AQSh prezidenti, shuningdek, iqlim masalalarida “Xitoy, Rossiya va Saudiya Arabistoni nima qilmayotgani”ga e’tibor qaratishga chaqirdi.
Italiya poytaxtida G20 ning yillik sammiti 30—31-oktabr kunlari bo‘lib o‘tdi. G20 yig‘ilishi ishtirokchilari Rimda ikki kun davom etgan muhokamalar yakunida global isishni Selsiy bo‘yicha 1,5 darajaga cheklash bo‘yicha kelishib oldi, biroq bu maqsadga erishish uchun butun dunyo hamjamiyatidan muhim va samarali choralar talab etilishini tan oldi.
Rossiya va Xitoy rahbarlari bu yilgi sammitda qatnashmadi. Ular konferensiya ishtirokchilari bilan videoaloqa orqali muloqot qildi. Xususan, Putin yig‘ilishda so‘zga chiqib, boshqa davlatlar qatori Rossiya ham global isish oqibatlarini boshidan kechirayotganini aytdi. “Biz cho‘llanish va tuproq eroziyasiga duch kelyapmiz. Ayniqsa, hududimizning katta qismini egallagan abadiy muzliklar erib borayotganidan xavotirdamiz”, — dedi Rossiya rahbari. Uning ta’kidlashicha, Rossiyada o‘rtacha yillik harorat global haroratdan tezroq ko‘tarilib bormoqda va o‘n yil ichida deyarli yarim darajaga oshgan, Arktikada esa o‘zgarishlar bundan ham tezroq sodir bo‘lmoqda.
Sammitdan so‘ng Birlashgan Millatlar Tashkiloti bosh kotibi Antoniu Guterrish G20 yetakchilarining uchrashuvi uning umidlarini oqlamaganini bildirdi. “Men G20 ning global yechimlar bo‘yicha majburiyatini olqishlagan bo‘lsam-da, Rimdan amalga oshmagan umidlar bilan ketyapman, lekin harqalay ular so‘nmadi”, — dedi u.
Izoh (0)