Sudanda parlament saylovlarini o‘tkazish uchun 1,5 yil yetarli. Bu haqda mamlakat harbiy yetakchisi, Qurolli Kuchlar bosh qo‘mondoni Abdul Fattoh al-Burhonga tayanib, “RIA Novosti” xabar berdi.
Eslatib o‘tamiz, Sudan harbiylari 25-oktabrga o‘tar kechasi mamlakat muvaqqat hukumatining bir qator vazirlarini, jumladan, muvaqqat bosh vazir Abdulla Xamdokni hibsga olgandi. O‘tish davrida Suveren kengash rahbari Abdul Fattoh al-Burhon xalqqa telemurojaat orqali favqulodda holat joriy etilishi va mamlakat hukumatining tarqatib yuborilishini ma’lum qildi. 26-oktabr kuni Xamdok va uning rafiqasi poytaxtdagi qarorgohga qaytgani ma’lum bo‘ldi.
Al-Burhon 25-oktabr kuni mamlakatdagi saylovlar 2023-yilga rejalashtirilganini e’lon qilgandi. Uning so‘zlariga ko‘ra, dastlab saylovlar 2022-yilning aprelida o‘tkazilishi kerak bo‘lgan, biroq Jubada erishilgan tinchlik bitimidan so‘ng, muddat ko‘plab tomonlar bilan kelishgan holda bir yilga uzaytirilgan.
“Saylovlarga belgilangan (tayyorgarlik) muddat yakunlanishga yaqinlashayotgani sabab ko‘plab tomonlar, jumladan, UNITAMS bilan (BMTning Sudandagi o‘tish davrini qo‘llab-quvvatlash borasidagi missiyasi — tahr.) konsultatsiyalar o‘tkazdik, ularning barchasi saylovlarga tayyorgarlik ko‘rish uchun 1,5 yil yetishini ma’lum qildi. Siyosiy kuchlar saylovlarga qiziqishi kerak, 1,5 yil ularga yetmaydi deb o‘ylamayman”, — deya ma’lum qiladi al-Burhon.
“Biz barchaga, Sudan va sudanliklarga yordam hamda qo‘llab-quvvatlov ko‘rsatishni istaganlarga ularning yordamini mamnuniyat bilan qabul qilishimizni aytyapmiz… Sudan davlati va xalqini qo‘llab-quvvatlash uchun olib kelinadigan mablag‘larni, shubhasiz, so‘raymiz”, — deydi u.
Avvalroq AQSh, Germaniya va Jahon banki harbiylar fuqarolik hukumatini hokimiyatga qaytarmaguncha iqtisodiy yordam ko‘rsatishni to‘xtatishini ma’lum qilgandi.
Izoh (0)