ОАВ: Бразилия президентининг қўриқчилари журналистларга ҳужум қилди

Бразилия президенти Жаир Болсонарунинг қўриқчилари президентнинг Г20 саммити доирасида Римга сафарини ёритаётган бразилиялик журналистларга нисбатан зўравонлик қўллагани айтилмоқда. Бу ҳақда Reuters хабар берди.

Агентликнинг таъкидлашича, Болсонару матбуот билан душманлик муносабатларига эга. У анчадан буён журналистларни сохта хабарлар чоп этишда ва унга нисбатан адолатсиз муносабатда бўлишда айблаб келади.

Хабарга кўра, журналистларга ҳужум президент Италия пойтахти кўчаларини кезиб, миллий терма жамоа либосидаги айрим бразилияликлар билан учрашган пайтда содир бўлган. У Бразилиядаги коронавирус инқирозини ҳал қилишда хатоликларга йўл қўйгани учун қаттиқ танқид қилинган ва баъзилар унинг ҳаракатларини «геноцид» деб атаган.

Журналистларнинг видеотасвирларда тансоқчилар журналистларни кўчага итариб юбораётгани, Болсонару эса ўз тарафдорлари билан селфи тушиб, суҳбатлашаётганини кўриш мумкин.

Globo телеканали журналисти Леонардо Монтейро Болсонарудан нега Г20 нинг бирорта тадбирида қатнашмагани ҳақида сўраганидан сўнг тансоқчилардан бири унинг қорнига мушт тушириб, орқага суриб ташлаган, деб ёзади Deutsche Welle.

«Globo ўз мухбири Леонардо Монтейро ва Римдаги бошқа ҳамкасбларига нисбатан қилинган тажовузни кескин қоралайди ва жавобгарликни тўлиқ баҳолашни талаб қилади», — дейилади баёнотда.

Бразилиянинг Folha de S. Paulo газетасининг Европадаги мухбири Ана Эстела Де Соуза зобитлар «уни туртиб, қўпол муомала қилган»ини айтди. «Бунга чидаб бўлмайди. Биз шикоят қиламиз. 20 йил давомида мен президентлик сафарлари ва шунга ўхшаш воқеаларни ёритганман, ҳеч қачон мен билан бундай воқеа содир бўлмаган», — дейди у.

Хавфсизлик ходимларининг бразилиялик ёки италиялик экани номаълум. Globo маълумотларига кўра, Болсонарунинг хавфсизлигини таъминлаш вазифаси италияликларга юкланган.

Аввалроқ Бразилия сенаторлари коронавирус билан боғлиқ вазият сабаб президент Болсонаруга қарши айбловни маъқуллаган эди. Шунингдек, Бразилия президенти Амазония ўрмонларини йўқ қилишдаги иштироки билан инсониятга қарши жиноятларда айбланмоқда.