Олмалиқ кон-металлургия комбинати таркибидаги Ангрен қувур заводи юқори сифатли мис қувурлар ишлаб чиқарувчи корхона сифатида ички ва ташқи бозорда аллақачон ўз ўрни ва нуфузини топишга улгурган.
Турли диаметрга эга мис қувурларни ишлаб чиқаришга ихтисослаштирилган замонавий завод 2013 йилда Тошкент вилояти, Ангрен махсус индустриал зонасида ташкил этилган. Корхонада халқаро талабларга жавоб берадиган турли диаметрли мис қувурлар ишлаб чиқарилади. Заводнинг лойиҳа қуввати йилига 5000—8000 тоннани ташкил этади. Асосий хомашё Олмалиқ кон-металлургия комбинати томонидан етказиб берилади. Заводда ишлаб чиқарилаётган мис қувурлар кундалик ҳаётда, ишлаб чиқаришда, қурилиш ишларида, сув қувурлари эса иситиш коммуникацияларини ўтказишда, иқлим ускуналарини ўрнатишда кенг қўлланилади. Бундан ташқари, мис қувурларидан кемасозлик ва энергетика соҳаларида ҳам кенг фойдаланилади.
Заводимиз мис қувурларини ишлаб чиқариш ҳажмига кўра, Марказий Осиёдаги энг йирик корхона ҳисобланади. Жамоамиз жорий йилнинг октябрь ойига қадар 4500 тоннадан ортиқ мис қувурларини ишлаб чиқариб, белгиланган режани ортиғи билан бажаришга эришди. Режага кўра, 2600 тонна маҳсулот хорижлик харидорларга юборилиши керак эди. Жумладан, Қозоғистон, Россия, Озарбайжон, Қирғизистон, Туркия, Болгария ва Беларусь каби мамлакатларга 41 миллион долларлик маҳсулот экспорт қилинди. Келгуси йилдан бошлаб, Миср ва Германия каби давлатларга ҳам ўз маҳсулотимизни етказиб беришни мақсад қилганмиз, — дея таъкидлади Ангрен қувур заводи директори Эрйигит Сулаймонов.
Маҳсулотларнинг юқори сифатини таъминлаш мақсадида ишлаб чиқариш жараёнида замонавий технологиялардан фойдаланилади. Корхона ўз маҳсулотларини ички ва ташқи бозорга муваффақиятли сотмоқда. Ишлаб чиқарилган мис қувурлари асосан экспортга йўналтирилган. Асосий истеъмолчилар МДҲ давлатлари, Туркия ва Шарқий Европа мамлакатлари ҳисобланади.
Корхона жамоаси бугунги кунда эришган ютуқлари билан қаноатланиб қолмай, бунданда улкан натижалар сари интилишни мақсад қилган. Хусусан, келгуси йилда маҳсулотлар хилма-хиллигини кенгайтириш, янги турдаги маҳсулотларни ишлаб чиқариш ва янги бозорларга чиқиш ҳисобига экспорт ҳажмини сезиларли даражада ошириш, ҳамда экспорт географиясини кенгайтириш режалаштирилган.
Жорий йилнинг 28 июнь куни Ўзбекистон Республикаси Президенти Шавкат Мирзиёев томонидан мис ишлаб чиқаришни янада ривожлантириш ҳамда саноат кластерини ташкил этиш масалалари юзасидан йиғилиш ўтказилиб, унда соҳага оид бир қатор муҳим вазифалар белгилаб берилган эди. Йиғилишда таъкидланганидек, ҳозирги кунда мисдан келадиган даромад 2,5 миллиард долларни ташкил этмоқда. Аммо ушбу кўрсаткични 7−8 миллиард долларга етказиш мумкин. Шунингдек, халқаро экспертларнинг фикрича, электромобиллар, электротехника ва қайта тикланувчи энергия соҳаларининг ривожланиши эвазига 2030 йилга бориб дунёда мисга бўлган талаб 40 фоизга ошиши кутилмоқда.
Ангрен қувур заводи томонидан ушбу йўналишда ҳам бир қатор ишлар амалга оширилмоқда. Жумладан, Олмалиқ кон-металлургия комбинатида мис саноати кластерини ривожлантириш хизмати ташкил этилган бўлиб, завод билан ҳамкорликда бир қатор лойиҳаларни ишлаб чиқмоқда ва уларни изчил амалга оширишни мақсад қилган.
Маълумот шериклик ҳуқуқи асосида тайёрланди.
Изоҳ (0)