“Hovlidan aholini tabiiy gaz bilan ta’minlovchi gaz quvuri o‘tgani ma’lum bo‘lgan”. Qarshida ikki bolaning o‘limiga sabab bo‘lgan bir yil avvalgi portlash haqida

Qashqadaryo viloyatining Qarshi shahri “Otchopar” mahalla fuqarolar yig‘inida joylashgan xonadonlarning birida 2021-yilning 6-yanvar kuni, taxminan, soat 08:10 da gaz-havo aralashmasining chaqnashi (portlash) yuz bergan edi. Oqibatda xonadon egasining 16 yoshli o‘g‘li va 14 yoshli jiyani vafot etgandi. Viloyat Favqulodda vaziyatlar boshqarmasi boshlig‘i Farhod Mirzayevning ma’lumot berishicha, portlash sodir bo‘lgan xonadon hovlisining pastki qismidan aholini tabiiy gaz bilan ta’minlovchi gaz quvuri o‘tgani ma’lum bo‘lgan.

Qayd etilishicha, Farhod Mirzayev bu haqda Qarshi shahridagi Jurnalistlar uyida bo‘lib o‘tgan matbuot anjumanida ma’lum qilgan.

“Aka-ukalar qo‘shni bo‘lish maqsadida yangi qurib bitkazilayotgan namunali uylardan ikkitasini yonma-yon qilib olishni maqsad qilgan va mahallaga o‘tib ketuvchi yo‘lni hovli o‘rtasida qoldirib, boshqa tomonni esa yo‘l sifatida qoldirgan. Aslida loyihada o‘sha gaz quvuri o‘tgan joy hovlilar tashqarisida qoldirilgan. Ammo aka-ukalar qo‘shni bo‘lib yashash maqsadida quruvchini ham shunga ko‘ndirgan va gaz quvuri o‘tgan mahallaga olib o‘tuvchi yo‘lni hovli ichkarisida qoldirgan. Ming afsuski, gaz quvuri ham eski va yemirilgan bo‘lgani bois, gaz sizib chiqqan. Shuningdek, portlash sodir bo‘lgan xonadonda katta ehtimol bilan novvoyxona ham bo‘lgan. Shu sabab uyning pastki qismidagi podvalda gaz to‘plangan va chaqnash, yong‘in emas, portlash sodir bo‘lgan. Oqibatda 16 yoshli va 14 yoshli voyaga yetmagan bolalar vafot etgan”, — deydi Farhod Mirzayev.

Mirzayevning qo‘shimcha qilishicha, mazkur hodisadan so‘ng holat o‘rganilib, xonadon hovlisining darvozaxonasidan o‘tgan gaz quvuridan aholiga gaz uzatish to‘xtatilib, aholini boshqa quvur orqali gaz bilan ta’minlash yo‘lga qo‘yilgan.

“Bu haqda bizga ‘Hududgaz’ mas’ullari 2021-yilning aprel oyida axborot berishgandi. Unga ko‘ra, shu voqea sabab viloyatdagi adashmasam, 65 kilometr gaz quvuri yer ostidan yer ustiga chiqarilgan va barcha gaz quvurlarining yaroqliligi ko‘zdan kechirilgan”, — deydi mas’ul.

Eslatib o‘tamiz, avvalroq Qashqadaryoda 2021-yilning o‘tgan to‘qqiz oyi davomida 709 ta yong‘in sodir bo‘lgan bo‘lib, mazkur yong‘inlar oqibatida 5 nafar fuqaro vafot etgani, 29 nafar fuqaro esa kuyish jarohatlarini olgani ma’lum qilingandi.