Ijtimoiy tarmoqlarda “Surxondaryoda bo‘lganligi aytilayotgan ushbu hodisada — maktab o‘quvchilari o‘rtasidagi ayovsiz mushtlashuv” sarlavhasi ostida videolavha tarqaldi. Viloyat IIB matbuot xizmati holat yuzasidan rasmiy ma’lumot berdi.
Ma’lum qilnishicha, ushbu videolavha yuzasidan Termiz shahar Ichki ishlar boshqarmasining mas’ul xodimlari tomonidan o‘rganish ishlari olib borilib, voqea 26-oktabr kuni soat 15:00 larda 12-sonli umumiy o‘rta ta’lim maktabida yuz bergani aniqlandi.
Shu maktabning 7-sinf o‘quvchisi F.A. hamda 6-sinf o‘quvchisi S.Q. tanaffus vaqtida yo‘lakda bir-biriga turtinib ketishi oqibatida maktab hovlisida o‘zaro janjallashib qolgan va bir-birlari bilan mushtlashgan.
“Mazkur holat yuzasidan hozirda Termiz shahar IIB huquqbuzarliklar profilaktikasi bo‘limi tomonidan tergovga qadar tekshiruv harakatlari o‘tkazilmoqda. Viloyat Ichki ishlar boshqarmasi tomonidan mazkur tergovga qadar tekshiruv harakatlari nazoratga olindi, qonuniy qaror qabul qilinishi ta’minlanadi”, — deyiladi IIB xabarida.
Izoh (0)