«Ҳовлидан аҳолини табиий газ билан таъминловчи газ қувури ўтгани маълум бўлган». Қаршида икки боланинг ўлимига сабаб бўлган бир йил аввалги портлаш ҳақида

Қашқадарё вилоятининг Қарши шаҳри «Отчопар» маҳалла фуқаролар йиғинида жойлашган хонадонларнинг бирида 2021 йилнинг 6 январь куни, тахминан, соат 08:10 да газ-ҳаво аралашмасининг чақнаши (портлаш) юз берган эди. Оқибатда хонадон эгасининг 16 ёшли ўғли ва 14 ёшли жияни вафот этганди. Вилоят Фавқулодда вазиятлар бошқармаси бошлиғи Фарҳод Мирзаевнинг маълумот беришича, портлаш содир бўлган хонадон ҳовлисининг пастки қисмидан аҳолини табиий газ билан таъминловчи газ қувури ўтгани маълум бўлган.

Қайд этилишича, Фарҳод Мирзаев бу ҳақда Қарши шаҳридаги Журналистлар уйида бўлиб ўтган матбуот анжуманида маълум қилган.

«Ака-укалар қўшни бўлиш мақсадида янги қуриб битказилаётган намунали уйлардан иккитасини ёнма-ён қилиб олишни мақсад қилган ва маҳаллага ўтиб кетувчи йўлни ҳовли ўртасида қолдириб, бошқа томонни эса йўл сифатида қолдирган. Аслида лойиҳада ўша газ қувури ўтган жой ҳовлилар ташқарисида қолдирилган. Аммо ака-укалар қўшни бўлиб яшаш мақсадида қурувчини ҳам шунга кўндирган ва газ қувури ўтган маҳаллага олиб ўтувчи йўлни ҳовли ичкарисида қолдирган. Минг афсуски, газ қувури ҳам эски ва емирилган бўлгани боис, газ сизиб чиққан. Шунингдек, портлаш содир бўлган хонадонда катта эҳтимол билан новвойхона ҳам бўлган. Шу сабаб уйнинг пастки қисмидаги подвалда газ тўпланган ва чақнаш, ёнғин эмас, портлаш содир бўлган. Оқибатда 16 ёшли ва 14 ёшли вояга етмаган болалар вафот этган», — дейди Фарҳод Мирзаев.

Мирзаевнинг қўшимча қилишича, мазкур ҳодисадан сўнг ҳолат ўрганилиб, хонадон ҳовлисининг дарвозахонасидан ўтган газ қувуридан аҳолига газ узатиш тўхтатилиб, аҳолини бошқа қувур орқали газ билан таъминлаш йўлга қўйилган.

«Бу ҳақда бизга ‘Ҳудудгаз’ масъуллари 2021 йилнинг апрель ойида ахборот беришганди. Унга кўра, шу воқеа сабаб вилоятдаги адашмасам, 65 километр газ қувури ер остидан ер устига чиқарилган ва барча газ қувурларининг яроқлилиги кўздан кечирилган», — дейди масъул.

Эслатиб ўтамиз, аввалроқ Қашқадарёда 2021 йилнинг ўтган тўққиз ойи давомида 709 та ёнғин содир бўлган бўлиб, мазкур ёнғинлар оқибатида 5 нафар фуқаро вафот этгани, 29 нафар фуқаро эса куйиш жароҳатларини олгани маълум қилинганди.