O‘zbekiston tashqi ishlar vaziri Abdulaziz Komilov “Rossiya 24” telekanaliga bergan intervyusida O‘zbekiston geosiyosiy raqiblar manfaatlarining to‘qnashuv maydoniga aylanishi mumkinligi borasidagi savolga javob berdi. Intervyu matni bilan TIV matbuot xizmati bo‘lishgan.
“Bugungi kunda ko‘p qutbli dunyo shakllanmoqda. Bu kabi dunyoda yashab, bir tomonlama siyosatga, bir tomonlama vektorga suyanadigan bo‘lsa, bu kabi siyosat yetarlicha samarador va hatto aksilsamarador bo‘ladi. Bundan tashqari, bu kabi yo‘nalish ma’lum xatarlarni keltirib chiqarishi mumkin”, — deydi TIV rahbari.
“Yirik davlatlar raqobati xususida realist bo‘lib aytish mumkinki, u davom etmoqda. Hatto, tashqi siyosat borasida bir-biriga yaqin hisoblangan davlatlar o‘rtasida ham raqobat kuzatilyapti. Shunga qaramay, bu raqobat mintaqada ham bo‘lmoqda. Bunday sharoitda biz nima qilamiz, degan savol paydo bo‘ladi? Biz hozirgi siyosatimizni davom ettiramiz”, — deydi Abdulaziz Komilov.
Uning ta’kidlashicha, raqiblik yangi “sovuq urush”ning ilk alomatlari paydo bo‘layotgan sharoitda kuchaymoqda. Bu ushbu hodisaning oqibatlarini yanada chuqurlashtiradi, chunki dunyodagi vaziyat tobora qaltis tus ola boshlaydi.
“Biz raqobat va kimo‘zarlik bizga o‘zimiz istamagan biror-bir siyosiy oqibatlar olib kelishini xohlamaymiz. Ular bizni bir tomonni deb boshqa mamlakat uchun nomaqbul bo‘lgan pozitsiyani tanlashga majbur qiladigan holatga solib qo‘yishiga yo‘l qo‘yib bo‘lmaydi. Mazkur murakkab vazifa jiddiy diplomatik amaliyotni talab qiladi”, — deya qayd etadi TIV rahbari.
Shu sababli biz hozirgi tutgan pozitsiyamizni davom ettiramiz. Bu borada aniq qarashlarimiz va konsepsiyamiz bor. Biror kim bilan mojaroga borish niyatida emasmiz va doim milliy manfaatlarimizdan kelib chiqamiz”, — deydi Abdulaziz Komilov.
Izoh (0)