Тошкентда 63 ёшли аёл невараси тенги йигит томонидан зўравонликка учрагани ҳақида хабар берилган эди. Пойтахт ИИББ матбуот хизмати ҳолат юзасидан жиноят иши қўзғатилганини маълум қилди.
Хабарга кўра, гумонланувчи 20 ёшли А.З.га нисбатан Чилонзор тумани ИИО ФМБ Тергов бўлими томонидан Жиноят кодексининг 277-моддаси (безорилик) аломатлари билан жиноят иши қўзғатилиб, тергов ҳаракатлари олиб борилмоқда. Тергов якуни бўйича қонуний қарор қабул қилинади.
Эслатиб ўтамиз, воқеа ҳақида Ўзбекистонда зўравонликка қарши «Nemolchi.uz» лойиҳасида эълон қилинганди. Унда эрталаб сайрга чиққан 63 ёшли аёл маст ҳолдаги йигит томонидан зўравонликка учраганини маълум қилинган. Йигит тегажоғлик қилгани учун қаршилик кўрсатган аёлга ўлдириш билан таҳдид қилиб, кийимларини йиртиб, калтаклай кетган. Ҳужумдан сўнг аёлнинг соғлиғига жиддий зарар етган: чап кўзнинг контузияси, нейропатия, чап кўз артериал гипертензияси.
Йигит ва унинг адвокати эса воқеада аёлнинг ўзини айбламоқда. Уларнинг сўзларига кўра, аёл йигитни ҳақорат қилиб, кейин сабабсиз урган. Йигит маст бўлгани учун ҳеч нарсани эслай олмайди, бироқ дастлаб жабрланувчини севган қизи билан адаштириб юборгани эсида. Адвокат 63 ёшли аёл ўзига ўзи зарар етказган бўлиши мумкин деб ҳам ҳисобламоқда. У, шунингдек, аёлни воқеа жойида гувоҳларни кутмаганликда, 102 ёки 103 га қўнғироқ қилмаганликда айблаган.
Изоҳ (0)