Davlat xavfsizlik xizmatining Toshkent viloyati bo‘yicha boshqarmasi hamda Bosh prokuratura huzuridagi departamentning hududiy boshqarmasi xodimlari tomonidan Yangiyo‘l shahrida o‘tkazilgan tezkor tadbirda qalbaki pul tayyorlash bilan shug‘ullanuvchi shaxslar faoliyatiga chek qo‘yildi, deb xabar beradi O‘zA.
Ma’lum qilinishicha, 1993-yil Qashqadaryo viloyatida tug‘ilgan fuqaro Yangiyo‘l shahridagi yashash manzilida onasi hamda ayoli bilan birgalikda qalbaki milliy valyuta tayyorlash bilan shug‘ullangan.
O‘tkazilgan tezkor tadbir davomida ulardan 19,6 million so‘m miqdoridagi 196 dona qalbaki 100 ming so‘mlik kupyura, 2 ta kompyuter, 2 ta rangli printer, qog‘oz kesish uskunasi va boshqa ashyoviy dalillar rasmiylashtirib olingan.
Shuningdek, ularning yashash xonadonida 1 dona pnevmatik to‘pponcha borligi ham aniqlanib, tegishli tartibda olib qo‘yilgan.
Bundan tashqari, qalbaki valyuta sotib olish uchun kelgan Samarqand viloyatining Nurobod tumanida yashovchi, 1971- va 1984- yillarda tug‘ilgan, muqaddam sudlangan ikki nafar shaxs ham hibsga olingan.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Avvalroq Toshkent viloyatida 10 ming dollarni noqonuniy sotishga uringan shaxslar ushlangani, Toshkent viloyatida 200 mln so‘mdan ortiq qalbaki pullarni muomalaga chiqarib yuborgan shaxslar hibsga olingani, Toshkentda 100 ming so‘mlik kupyuralarni qalbakilashtirganlar qo‘lga olingani to‘g‘risida xabar berilgandi.
Izoh (0)