O‘zbekistonda 2021-yilning 9 oyida qonunbuzarlardan 16,3 mlrd so‘m undirib olingan — Ekologiya qo‘mitasi

AOKAda Ekologiya va atrof-muhitni muhofaza qilish davlat qo‘mitasi mutasaddilari ishtirokida matbuot anjumani bo‘lib o‘tdi. Tadbirda ekologik nazorat reydlarida hamda brakonyerlikka qarshi kurashishda aniqlangan holatlar haqida ma’lumot berildi.

Qayd etilishicha, 2021-yilning o‘tgan 9 oyi mobaynida sohaga oid qonunchilik hujjatlari talablarini buzgan 34 275 nafar shaxs aniqlandi. 32 milliard so‘m ma’muriy jarima va tabiatga yetkazilgan zararlar hisoblanib, 16,3 milliard so‘m undirib olingan.

1365 ta holat bo‘yicha 15 milliard so‘m jarima va tabiatga yetkazilgan zararlarni undirish yuzasidan tayyorlangan materiallar huquqni muhofaza qilish organlariga kiritilgan. 12 ta holat bo‘yicha 1,6 milliard so‘mlik da’volar yuzasidan qonunbuzarlik sodir etgan shaxslarni jinoiy javobgarlikka tortish bo‘yicha ish qo‘zg‘atilgan.

Huquqbuzarlardan 376 dona hayvon va parranda, 1 900 kilogramm baliq, 49 637 kilogramm dorivor va oziq-ovqatbop o‘simliklar, 1520 metr kub o‘tin, 45 ta ov qurol va 570 ta aslaha va boshqa inventarlar olib qo‘yilgan.

Inspeksiya tomonidan 23 ta idoraviy xizmat tekshiruvlari o‘tkazilib, natijasi bo‘yicha aniqlangan kamchiliklar va xodimlarga chora ko‘rish yuzasidan tegishli takliflar kiritildi va ijroga qaratilgan.

Jumladan, Bosh prokuratura, Tadbirkorlik subyektlarining huquqlari va qonuniy manfaatlarini himoya qilish bo‘yicha vakil (ombudsman) taqdimnomalari, fuqarolar murojaatlari hamda boshqa asoslarga muvofiq Surxondaryo, Jizzax, Navoiy, Toshkent, Buxoro, Samarqand, Xorazm, Qashqadaryo viloyatlari va Toshkent shahar boshqarmalarida xizmat tekshiruvi o‘tkazilgan.

Davlat inspektorlari tomonidan aniqlangan huquqbuzarlik holatlari 2020-yilning mos davriga nisbatan:

• Qoraqalpog‘iston Respublikasida 114 foizga;
• Buxoro viloyatida 112 foizga;
• Qashqadaryo viloyatida 108 foizga;
• Andijon viloyatida 104 foizga;
• Xorazm viloyatida 70 foizga;
• Toshkent viloyatida 74 foizga;
• Jizzax viloyati va Toshkent shahrida 80 foizga o‘sish kuzatilgan.