Ўзбекистон ташқи ишлар вазири Абдулазиз Комилов «Россия 24» телеканалига берган интервьюсида Ўзбекистон геосиёсий рақиблар манфаатларининг тўқнашув майдонига айланиши мумкинлиги борасидаги саволга жавоб берди. Интервью матни билан ТИВ матбуот хизмати бўлишган.
«Бугунги кунда кўп қутбли дунё шаклланмоқда. Бу каби дунёда яшаб, бир томонлама сиёсатга, бир томонлама векторга суянадиган бўлса, бу каби сиёсат етарлича самарадор ва ҳатто аксилсамарадор бўлади. Бундан ташқари, бу каби йўналиш маълум хатарларни келтириб чиқариши мумкин», — дейди ТИВ раҳбари.
«Йирик давлатлар рақобати хусусида реалист бўлиб айтиш мумкинки, у давом этмоқда. Ҳатто, ташқи сиёсат борасида бир-бирига яқин ҳисобланган давлатлар ўртасида ҳам рақобат кузатиляпти. Шунга қарамай, бу рақобат минтақада ҳам бўлмоқда. Бундай шароитда биз нима қиламиз, деган савол пайдо бўлади? Биз ҳозирги сиёсатимизни давом эттирамиз», — дейди Абдулазиз Комилов.
Унинг таъкидлашича, рақиблик янги «совуқ уруш»нинг илк аломатлари пайдо бўлаётган шароитда кучаймоқда. Бу ушбу ҳодисанинг оқибатларини янада чуқурлаштиради, чунки дунёдаги вазият тобора қалтис тус ола бошлайди.
«Биз рақобат ва кимўзарлик бизга ўзимиз истамаган бирор-бир сиёсий оқибатлар олиб келишини хоҳламаймиз. Улар бизни бир томонни деб бошқа мамлакат учун номақбул бўлган позицияни танлашга мажбур қиладиган ҳолатга солиб қўйишига йўл қўйиб бўлмайди. Мазкур мураккаб вазифа жиддий дипломатик амалиётни талаб қилади», — дея қайд этади ТИВ раҳбари.
Шу сабабли биз ҳозирги тутган позициямизни давом эттирамиз. Бу борада аниқ қарашларимиз ва концепциямиз бор. Бирор ким билан можарога бориш ниятида эмасмиз ва доим миллий манфаатларимиздан келиб чиқамиз», — дейди Абдулазиз Комилов.
Изоҳ (0)