O‘zbekistonda yetim bolalarni uy-joy bilan ta’minlash tartibi belgilandi

O‘zbekistonda yetim bolalar va ota-ona qaramog‘idan mahrum bo‘lgan bolalarni uy-joy bilan ta’minlash tartibi to‘g‘risidagi nizom tasdiqlandi, deb xabar beradi Telegram’dagi “Huquqiy axborot” kanali.

Nizomga ko‘ra, yetim bolalar va ota-ona qaramog‘idan mahrum bolalarga uy-joy viloyat hokimliklari tomonidan bozordagi ko‘p kvartirali uylardan ajratiladi. Bunda o‘quv-tarbiya muassasalari va tuman (shahar) hokimliklari bolalarni muassasada bo‘lish muddati tugashidan bir yil avval uy-joyga muhtoj sifatida “onlayn-navbat”ga kiritib boradi.

Bolalar 18 yoshga to‘lgan yilda:

• ko‘p kvartirali uy-joylardan umumiy maydoni 25 kvadrat metrdan kam bo‘lmagan 1 xonali;
• voyaga yetgan yetim bolalar va ota-ona qaramog‘idan mahrum bolalar o‘rtasida nikoh tuzilgan hollarda 50 kvadrat metrdan kam bo‘lmagan 2 xonali kvartiralar ajratiladi.

Bundan tashqari, 2022-yil 1-yanvardan yetim bolalar va ota-ona qaramog‘idan mahrum bolalarning uy-joyga muhtojligi “Ijtimoiy himoya yagona reyestri” axborot tizimi orqali aniqlanadi. Ularni farzandlikka, vasiylikka olish “Vasiylik va homiylik” elektron platformasi orqali onlayn murojaatga asosan amalga oshiriladi. Shuningdek, 2022/2023-o‘quv yilidan “Ijtimoiy ish” bakalavriat ta’lim yo‘nalishida “Vasiylik” va “Homiylik” sohasi bo‘yicha oliy ma’lumotli kadrlar tayyorlash yo‘lga qo‘yiladi.

Eslatib o‘tamiz, O‘zbekistonda 18 yoshga to‘lgan, uy-joyga muhtoj yetim bolalarga yangi qurilgan uy-joylar bepul ajratilishi haqida Shavkat Mirziyoyev 28-iyulda o‘tkazilgan yig‘ilishda ma’lum qilgandi. Prezident viloyat hokimlariga 1-oktabrga qadar 757 nafar yetim bolani uy-joy bilan ta’minlash vazifasini qo‘ygandi. Buning uchun 2021-yilda budjetdan 120 milliard so‘m yo‘naltiriladi.

10-avgust kuni “Yetim bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlashning yangi tizimini joriy etish chora-tadbirlari to‘g‘risida” Prezident qarori qabul qilindi.