Prezident huzuridagi Davlat xizmatini rivojlantirish agentligi O‘zbekistonning barcha tuman, (shahar)larida hokim va hokim o‘rinbosarlari faoliyatining baholash reytingini e’lon qildi, deb xabar beradi O‘zA.
Agentlik tomonidan respublikaning barcha tuman, (shahar)larida hokim va hokim o‘rinbosarlari faoliyatini eng muhim samaradorlik ko‘rsatkichlari (EMSK, KPI) asosida baholash tizimi yo‘lga qo‘yilgan. Bu o‘z navbatida hududni ijtimoiy-iqtisodiy rivojlantirish va natijaga erishishda har bir rahbarning hissasini aniq belgilash imkonini bermoqda.
Reyting natijalari ochiq, agentlikning “Argos.uz” portali “Reyting” sahifasiga joylashtirilgan va u quyidagi qismlardan iborat:
- natijadorligi yuqori hududlar;
- ko‘rsatkichlari eng yuqori tuman (shahar)lar;
- hududlardagi ko‘rsatkichlari eng quyi tuman (shahar)lar;
- hokim o‘rinbosarlarining EMSK bo‘yicha reytingi.
Hozirda viloyatlarning top tumanlari reytingida Navoiy viloyati yetakchilik qilayotgan bo‘lsa-da (87), eng oxirgi pog‘onani Surxondaryo viloyati egallagan (66). Hududlarda ko‘rsatkichlari eng yuqori tuman (shahar)larining umumiy reytingiga (98,2) Qorovulbozor tumani yetakchilik qilmoqda.
Hududlarda ko‘rsatkichlari eng quyi tuman (shahar)larining umumiy reytingining boshidan Sariosiyo (60,8), Chiroqchi (64,2), Bo‘stonlik tumanlari o‘rin olgan.
Eslatib o‘tamiz, Prezident Shavkat Mirziyoyev hokimlar lavozimini saylanadigan qilish taklifi bilan birinchi marta 2016-yil dekabrida chiqqandi. 2017-yil avgustida u hokimlarni xalq tomonidan saylash tizimini “hoziroq” joriy etishga tayyorligini bildirgan.
2020-yilning sentabr oyida davlat rahbari O‘zbekiston hokimlarni saylash tizimiga o‘tishini yana bir bor ta’kidlagan. Shu bilan birga, rivojlanish darajasi “qoniqarsiz” hamda “o‘rta” deb baholangan tuman va shaharlarda inqirozga qarshi boshqaruv tizimi joriy etilishi ma’lum qilingan. Ya’ni, ularga rahbarlik qilish istagini bildirgan har qanday talabgor hududni rivojlantirish dasturini mahalliy kengashlarda himoya qilishi mumkin. Xalq vakillarini ishontira olgan salohiyatli kishilar butun jamoasi bilan tumanga rahbar etib tayinlanadi.
Izoh (0)