Ўзбекистонда етим болалар ва ота-она қарамоғидан маҳрум бўлган болаларни уй-жой билан таъминлаш тартиби тўғрисидаги низом тасдиқланди, деб хабар беради Telegram’даги «Ҳуқуқий ахборот» канали.
Низомга кўра, етим болалар ва ота-она қарамоғидан маҳрум болаларга уй-жой вилоят ҳокимликлари томонидан бозордаги кўп квартирали уйлардан ажратилади. Бунда ўқув-тарбия муассасалари ва туман (шаҳар) ҳокимликлари болаларни муассасада бўлиш муддати тугашидан бир йил аввал уй-жойга муҳтож сифатида «онлайн-навбат»га киритиб боради.
Болалар 18 ёшга тўлган йилда:
- кўп квартирали уй-жойлардан умумий майдони 25 квадрат метрдан кам бўлмаган 1 хонали;
- вояга етган етим болалар ва ота-она қарамоғидан маҳрум болалар ўртасида никоҳ тузилган ҳолларда 50 квадрат метрдан кам бўлмаган 2 хонали квартиралар ажратилади.
Бундан ташқари, 2022 йил 1 январдан етим болалар ва ота-она қарамоғидан маҳрум болаларнинг уй-жойга муҳтожлиги «Ижтимоий ҳимоя ягона реестри» ахборот тизими орқали аниқланади. Уларни фарзандликка, васийликка олиш «Васийлик ва ҳомийлик» электрон платформаси орқали онлайн мурожаатга асосан амалга оширилади. Шунингдек, 2022/2023-ўқув йилидан «Ижтимоий иш» бакалавриат таълим йўналишида «Васийлик» ва «Ҳомийлик» соҳаси бўйича олий маълумотли кадрлар тайёрлаш йўлга қўйилади.
Эслатиб ўтамиз, Ўзбекистонда 18 ёшга тўлган, уй-жойга муҳтож етим болаларга янги қурилган уй-жойлар бепул ажратилиши ҳақида Шавкат Мирзиёев 28 июлда ўтказилган йиғилишда маълум қилганди. Президент вилоят ҳокимларига 1 октябрга қадар 757 нафар етим болани уй-жой билан таъминлаш вазифасини қўйганди. Бунинг учун 2021 йилда бюджетдан 120 миллиард сўм йўналтирилади.
10 август куни «Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида» Президент қарори қабул қилинди.
Изоҳ (0)