O‘zbekiston musulmonlari idorasi ijtimoiy tarmoqlarda Umra ziyoratini amalga oshirmoqchi bo‘lgan musulmonlar 14 kun kutishiga doir talab bekor qilingani to‘g‘risida tarqalgan xabarlarga munosabat bildirdi.
Ma’lum qilinishicha, Musulmonlar idorasi O‘zbekistonning Jidda shahrida joylashgan Bosh konsulxonasidagi Haj va Umra masalalari bo‘yicha attashesi bilan doimiy muloqot qilib, har bir jarayonni diqqat bilan kuzatib bormoqda.
Saudiya Arabistoni Haj va Umra vazirligi shirkati ishlari bosh boshqarmasi ma’lumotiga ko‘ra, podshohlikda epidemiologik vaziyat yaxshilanayotgani, kunlik kasallanish 65 nafarga tushgani, vaksina qilingan aholi 60 foizdan oshishi munosabati bilan umra ziyorati uchun o‘rnatilgan bir qator cheklovlar Saudiya Arabistonida istiqomat qilayotgan aholi va podshohlikda bo‘lib turgan chet el fuqarolari uchun yumshatilgan.
Jumladan, 28-oktabr kunidan boshlab, Haj va Umra vazirligining I’tamarna (“Umra qildik”) mobil dasturi orqali ayni vaqtda Saudiya Arabistonida istiqomat qilayotgan aholi va podshohlikda bo‘lib turgan chetn el fuqarolari uchun o‘rnatilgan 14 kun ichida faqat bir marotaba umra amalini ado etish cheklovi olib tashlangan.
Avvalgi tartib bo‘yicha Makka shahrida bo‘lib turgan fuqaro Masjid al-Haromga ehrom kiygan holda umraning tavof va sa’y amalini bir marta bajargandan keyin, navbatdagi umra qilishi uchun 14 kundan keyin ruxsat berilar edi. Endilikda yangi qoidaga ko‘ra, Makka shahrida istiqomat qilayotgan aholi yoki ushbu shaharda vaqtincha yashab turgan xorijliklar bir necha bor umra amalini ado etishlari mumkin bo‘ladi.
“Ta’kidlash zarurki, ushbu yengillik faqatgina ayni vaqtda Saudiya Arabistonida istiqomat qilayotgan aholi va vaqtincha yashab turgan chet el fuqarolariga tegishlidir. Xorij mamlakatlaridan keladigan fuqarolarga qo‘yilgan cheklovlar bekor qilingani to‘g‘risida ma’lumotlar mavjud emas”, — deyiladi idora munosabatida.
Avvalroq Saudiya Arabistoni hukumati chet elliklar kichik haj — Umra ziyoratini amalga oshirish uchun 10-avgustdan qirollikka kirishi mumkinligini e’lon qilgan edi.
Eslatib o‘tamiz, bu yil Haj ziyorati 17—22-iyul kunlari amalga oshirildi. Makkaga bu yil 60 ming ziyoratchi tashrif buyurishi mumkin bo‘ldi, ammo ular faqat qirollik fuqarolari va u yerda yashovchi shaxslardan iborat bo‘ldi, chet elliklar esa pandemiya tufayli ikkinchi yil ham Haj ziyoratiga qo‘yilmadi. Ziyoratchilarning barchasi 18—65 yoshda va koronavirusga qarshi emlangan bo‘lishi sharti qo‘yildi.Saudiya Arabistoni 2020-yil oktabr oyidan boshlab mamlakatda yashovchi aholisi uchun Umra ziyoratini amalga oshirishga ruxsat bergan edi. Va o‘sha oy o‘rtalarida mamlakat hukumati yetti oy ichida birinchi marta Makkadagi Al-Harom masjidida namoz o‘qilishiga ruxsat berdi.
Izoh (0)