Markaziy bank tahlillariga ko‘ra, O‘zbekistonda 2021-yilning uchinchi choragida ikkilamchi ko‘chmas mulk bozoridagi narxlar o‘tgan chorakka nisbatan 2,3 foizga oshdi. Bu haqda “Spot” xabar qildi.
Ma’lum bo‘lishicha, uy-joy bozoridagi bu kabi qiziqish iqtisodiy tiklanishning davom etayotgani, daromadning o‘sishi, shuningdek, fuqarolarning ko‘chmas mulk ko‘rinishidagi jamg‘armalarini tejashga intilishi bilan bog‘liq.
Shu bilan birga, o‘sish sur’ati biroz sekinlashgan. Uchinchi chorakdagi narxlarning o‘rtacha o‘sishi (2,3 foiz) ikkinchi chorakka (5,7 foiz) nisbatan pastroq bo‘lgan.
Bundan tashqari, O‘zbekistonning 14 ta hududidan 6 tasida narxlarning pasayishi kuzatilgan. Eng katta sho‘ng‘ish Xorazm viloyatida (-9,8 foiz) qayd etilgan.
Qayd etilishicha, bu tendensiya ba’zi hududlarda birlamchi bozorlarda uy-joy sotib olishning keng tarqalgani bilan bog‘liq.
Talab va ko‘chmas mulk narxlarining o‘sishiga aholining jamg‘arma faolligi ta‘sir ko‘rsatadi. Markaziy bankning sentabr oyidagi inflyatsion kutilmalar bo‘yicha o‘tkazgan so‘rovida respondentlarning to‘rtdan bir qismidan ko‘prog‘i o‘z mablag‘ini ko‘chmas mulk ko‘rinishida saqlashni rejalashtirayotganini bildirgan.
Ta’kidlanishicha, uchinchi chorakda ko‘chmas mulk oldi-sotdisi bo‘yicha tuzilgan bitimlar soni 2020-yilning shu davriga nisbatan 17,3 foizga o‘sgan. Biroq sentabr oyida pasayish kuzatilib, avgust oyiga nisbatan 10 foizga kamroq shartnomalar tuzilgan. “Bu ko‘chmas mulk bozorida narxlarni yanada barqarorlashtirishning birinchi sharti bo‘lishi mumkin”, — deyiladi Markaziy bank hisobotida.
Qurilish bozoridagi o‘sish sur’ati uy-joy narxiga ta’sir qiluvchi omillardan biri hisoblanadi. Uchinchi chorak yakuniga ko‘ra, o‘sish 4,5 foizni tashkil etgan. Bu 2020-yil (8,6 foiz) va 2019-yil (24,2 foiz) ko‘rsatkichlaridan past.
Shuningdek, ko‘plab mamlakatlarda qurilish faolligining kuchayishi, yetkazib berish zanjiridagi uzilishlar va yuqori transport xarajatlari tufayli qurilish materiallari narxi keskin ko‘tarilgan. O‘zbekistonda yanvar—sentabr oylari davomida qurilish sohasidagi narx o‘rtacha 4,65 foizga oshgan.
Eslatib o‘tamiz, avvalroq Toshkentda ikkilamchi uy-joy bozoridagi o‘rtacha narxlar sharhi e’lon qilingandi. Unga ko‘ra, poytaxtda avgust oyida ikkilamchi uy-joy bozoridagi o‘rtacha narx har kvadrat metrga 7,5 million so‘mni, birlamchi bozorda taklif qilinayotgan narxlar esa har kvadrat metrga 8,4 million so‘mni tashkil etgan.
Bundan tashqari, O‘zbekistonda 2021-yilning yanvar—sentabr oylarida ko‘chmas mulk oldi-sotdisi bo‘yicha tuzilgan shartnomalar soni 2020-yilning shu davriga nisbatan 17 foizga oshgani ma’lum qilingan. Unda aytilishicha, Toshkent shahrida turar joy narxlari iyun oyidan beri 5—7 foizga o‘sgan.
O‘zbekistonda 2021-yilning ikkinchi choragi yakunlari bo‘yicha ikkilamchi bozordagi narxlarning dastlabki natijalari aniqlangan. Unga kora, narxlar respublika bo‘yicha birinchi chorakka nisbatan o‘rtacha 5,72 foizga o‘sgan.
Izoh (0)