Termiz shahrida “Yapon bog‘i” va arxeolog Kyudzo Kato memorial muzeyi quriladi

Surxondaryo viloyatining Termiz shahrida zamonaviy “Yapon bog‘i” hamda yaponiyalik mashhur arxeolog Kyudzo Kato memorial muzeyi quriladi, deb xabar berdi O‘zA.

Ma’lum qilinishicha, yaponiyalik professor, xalqaro kuzatuvchi Tetsuji Tanaka Termiz shahrida bo‘lib, Surxondaryo viloyati hokimi o‘rinbosari, viloyat Turizm va sport bosh boshqarmasi boshlig‘i Jo‘rabek To‘rayev bilan uchrashgan. Unda viloyat Turizm va sport bosh boshqarmasi, viloyat Arxitektura va qurilish boshqarmasi, Termiz shahar hokimligi mutasaddilari ishtirok etgan.

Uchrashuvda viloyatning turistik salohiyati, Termiz shahrida 5,5 gektar maydonda barpo etiladigan zamonaviy “Yapon bog‘i”, yaponiyalik mashhur arxeolog Kyudzo Kato memorial muzeyi qurilishi va olimning xotira haykalini o‘rnatish bilan bog‘liq masalalar atroflicha muhokama etilgan.

Ta’kidlanishicha, ushbu bog‘ni Termiz shahri markazidagi “Baxt bog‘i” hududidan qurish rejalashtirilgan. Buning uchun shahar hokimligi 5,5 gektar yer ajratgan. “Yapon bog‘i”da Kyudzo Kato memorial muzeyini qurish va olimning xotira haykalini o‘rnatish barobarida 100 o‘rinli muhtasham mehmonxona ham barpo etiladi. Bog‘ atrofi yashil maydonga aylantirilib, rang-barang gulzorlar tashkil qilinadi, yo‘laklar quriladi.

“Mamlakatingizga bu safar kelishdan maqsad Prezident saylovida xalqaro kuzatuvchi sifatidagi missiyam bor edi. Termizga esa Kushon hukmronligi davrida bunyod etilgan buddaviylik arxeologik yodgorliklarini ko‘rish va yana Termiz shahrida barpo etiladigan ‘Yapon bog‘i’da janob Kyudzo Kato xotirasiga bag‘ishlangan haykal o‘rnatish, kelgusida hududda olib boriladigan arxeologik qazish ishlariga yapon olimlarini ham jalb etish masalalarini o‘rganish uchun keldim”, — deydi professor Tetsuji Tanaka.­

Uning so‘zlariga ko‘ra, 2022-yilning may oyida Kyudzo Kato tavalludining 100 yilligi nishonlanadi,­ arxeologning haykali Tojikistonda tayyorlanmoqda. “Uni olib kelib, shu bog‘ga o‘rnatishni biz o‘z zimmamizga olamiz. Shuningdek, mazkur loyiha bizning g‘oyalarimiz ham e’tiborga olinib, amalga oshirilsa, maqsadga muvofiq bo‘lar edi”, — deydi u.

Uchrashuv yakunida yaponiyalik professor bog‘ barpo etiladigan hudud bilan tanishib, taklif va tavsiyalarini bildirgan. Termiz tumanidagi “Fayoztepa” arxeologik yodgorligini tomosha qilgan, O‘zbekistonni Afg‘oniston bilan bog‘laydigan Termiz—Xayraton ko‘prigini borib ko‘rgan.