Toshkentda dekan o‘rinbosari talaba qizga tegajog‘lik qilib, uni oynadan itarib yuborgani haqidagi xabarlar keng jamoatchilik muhokamalariga sabab bo‘lgandi. Oliy va o‘rta maxsus ta’lim vazirligi OTMlaridagi tegajog‘lik holatlari haqida anonim tarzda murojaat etish mumkinligini ma’lum qildi.
“Aziz talaba-qizlar, opa-singillar! Agar siz ta’lim olayotgan yoki mehnat qilayotgan oliygoh, professional ta’lim muassasasida sizga nisbatan biror-bir ko‘rinishda tegajog‘lik, tazyiq yoki zo‘ravonlik sodir etilgan bo‘lsa yoxud ana shunday nojo‘ya xatti- harakatlar tahdidi ostida bo‘lsangiz yoki guvohi bo‘lgan bo‘lsangiz, hech ikkilanmay, Oliy va o‘rta maxsus ta’lim vazirligining 1006 ishonch telefoniga yoki @himoya_otv_bot ga murojaat qiling!”, — deyiladi vazirlik xabarida.
Qayd etilishicha, murojaat etgan talabalarning shaxsi va shaxsiy ma’lumotlari sir saqlanishi kafolatlanadi. Zarur bo‘lgan barcha yordam ko‘rsatiladi, nojo‘ya xatti-harakatlarga yo‘l qo‘ymaslik, sodir etilgan har bir holat bo‘yicha qat’iy choralar ko‘rilishi ta’minlanadi.
Eslatib o‘tamiz, Nizomiy nomidagi Toshkent davlat pedagogika universitetining 3-bosqich talabasining bu boradagi murojaatini “Nemolchi.uz” e’lon qilgandi. Unda qiz Zulfiya mukofotiga tavsiyanoma olish maqsadida yoshlar ishlari bo‘yicha 37 yoshli dekan o‘rinbosarining xonasiga kirganida eshikni ichkaridan qulflab, unga tegajog‘lik qilmoqchi bo‘lganini, oyna oldiga kelib, yordamga chaqirmoqchi bo‘lganida erkak uni derazadan itarib yuborganini bildirgan.
Talaba qiz 18-oktabr kuni Respublika shoshilinch tibbiy yordam ilmiy markaziga olib kelingan. Tezkor tekshiruvlar natijasida unga katatravma, qo‘shma jarohat, o‘ng o‘tirgich va qov suyaklarining sinib siljishi, quymuch suyagining o‘ng tomonda sinib qoniqarli turishi, beshinchi bel umurtqasi yon o‘sig‘ining sinib qoniqarli turishi, bosh miya yopiq jarohati, bosh miya chayqalishi, peshona sohasi ezilib yirtilgan jarohati, ikkinchi darajali travmatik shok tashxislari qo‘yilgan.
Qizning yaqinlari aytishicha, dekan o‘rinbosari tomonidan kelgan odamlar ularga o‘z ko‘rsatmalarini o‘zgartirishlari uchun pul taklif qilgan. Dekan o‘rinbosari esa hammaga qiz o‘z joniga qasd qilgan demoqda. U o‘qigan fakultet talabalari to‘liq onlayn ta’limga o‘tkazilgan.
19-oktabr kuni dekan o‘rinbosariga nisbatan Jinoyat kodeksining 105 (qasddan badanga o‘rtacha og‘ir shikast yetkazish), 118-moddasi (nomusga tegish) bilan jinoyat ishi qo‘zg‘atilgan. 23-oktabr kuni ekspertiza javobi chiqishi bilan dekan o‘rinbosari protsessual tartibda ushlangan.
Holatga Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, O‘zbekistonda gender tengligini ta’minlash komissiyasi a’zosi Saida Mirziyoyeva munosabat bildirib, talaba qizlarga nisbatan shilqimlikni jiddiy muammo deb atadi. Shu bilan birga jamoatchilikka oshkor etilayotgan bu kabi holatlar dengizdan tomchi ekanini ta’kidlab o‘tdi.
Saida Mirziyoyeva bu borada Senat, Bosh prokuratura, IIV va OAVning harakatini birlashtiradigan yirik loyiha zarurligini aytdi. Uning ta’kidlashicha, aybdorlar javobgarlikdan qocha olmasligi uchun bunday hodisalarning har biri jamoatchilikka oshkor qilinishi shart. Zo‘ravonlik qurbonlari ularning nidosini eshitadiganlar va yordam beradiganlar borligiga ishonchi komil bo‘lishi, zo‘ravonlar esa jazo muqarrar ekanligini anglashi zarur.
Mass-media fondi Vasiylik kengashi raisi Komil Allamjonov ham Saida Mirziyoyevaning bunday loyiha yaratish kerakligi haqidagi fikriga qo‘shilishini bildirdi.
Bundan avval Oliy va o‘rta maxsus ta’lim vazirligi talaba qizga tegajog‘lik qilingani aytilgan universitet rahbariyatiga qat’iy chora ko‘rilishini ma’lum qilgandi.
Izoh (0)