Sardor Umurzoqov JST rahbariyati bilan O‘zbekistonning tashkilotga a’zo bo‘lish masalasini muhokama qildi

26-oktabr kuni O‘zbekiston bosh vazirining o‘rinbosari, investitsiyalar va tashqi savdo vaziri Sardor Umurzoqov Jahon savdo tashkiloti bosh direktori o‘rinbosari Syanchen Chjan bilan uchrashuv o‘tkazdi, deb xabar beradi vazirlik matbuot xizmati.

Ma’lum qilinishicha, uchrashuvda O‘zbekistonning JSTga a’zo bo‘lishi bo‘yicha muzokara jarayonining hozirgi holati hamda bu boradagi hamkorlik doirasida navbatdagi tadbirlar muhokama qilindi.

Syanchen Chjan O‘zbekiston rahbariyatining mamlakatning JSTga a’zo bo‘lishi jarayonini faollashtirish borasidagi sa’y-harakatlarini yuqori baholagan. Unga ko‘ra, O‘zbekistonning tashabbuskorligi tufayli tashkilot bilan hamkorlik jadal tus olgan. Shuningdek, u 2021-yilning avgust oyida yangi lavozimni egallaganidan beri tashrif buyurgan birinchi mamlakat O‘zbekiston ekanini ta’kidlagan.

Qayd etilishicha, mamlakat hukumati savdo-sotiqni erkinlashtirish, JST bitimlari tamoyillari va qoidalari asosida tashqi savdoni isloh qilish tizimlarini modernizatsiya qilish, xorijiy investitsiyalarni rag‘batlantirish, shuningdek, barqaror iqtisodiy o‘sishni ta’minlash bo‘yicha jahonning eng yaxshi amaliyotlarini joriy etishga oid sa’y-harakatlarni davom ettirishga sodiq ekanligi ta’kidlangan.

Shuningdek, tashkilot rahbariyati ushbu tadbirni o‘tkazishda va umuman O‘zbekistonning JSTga a’zo bo‘lishi jarayonida har tomonlama qo‘llab-quvvatlashga tayyor ekanligini bildirgan. Zarur hujjatlarni tayyorlashda JST kotibiyati va uning xalqaro ekspertlari tomonidan O‘zbekistonga ko‘rsatilayotgan texnik yordamni kengaytirish bo‘yicha kelishuvga erishilgan.

“Uchrashuv yakunida tomonlar muzokara jarayoni bilan bog‘liq barcha masalalarni hal etishni jadallashtirish yuzasidan birgalikdagi ishlarni faollashtirishga o‘zaro tayyorligini bildirdilar”, — deyiladi xabarda.

Avvalroq Rossiya O‘zbekistonning Jahon savdo tashkilotiga a’zo bo‘lish jarayonida yordam berishga tayyorligini bildirgandi.