O‘zbekiston bo‘yicha yetkazib berilgan issiqlik energiyasi uchun aholining debitor qarzdorligi 2,1 trillion so‘mni tashkil qilmoqda. Bu haqda 28-oktabr kuni uy-joy kommunal xizmat ko‘rsatish vaziri o‘rinbosari Qurbon Tursunov ma’lum qildi.
“Respublika bo‘yicha yetkazib berilgan issiqlik energiyasi uchun aholining debitor qarzdorligi 2 trillion 100 million so‘mga teng.
Issiqlik ta’minoti korxonalarining gaz, elektr va sovuq suvdan qarzi ikki yarim trillion so‘mni tashkil etmoqda. 20 ta issiqlik ta’minoti korxonasi joylarga chiqib, aholiga tushuntirish ishlarini olib bormoqda. Iloji bo‘lmagan hollarda yozma ogohlantirishlar taqdim etmoqda, sud organlariga murojaat qilib, majburiy tartibda undirish choralari ko‘rilmoqda”, — degan u AOKAda o‘tkazilgan matbuot anjumanida.
Uning so‘zlariga ko‘ra, aholining to‘lov intizomiga amal qiladigan qismi 50—60 foizdan iborat. Qolgan 35—40 foiz aholiga shu kabi choralar ko‘rilmasa, to‘lovni undirish imkoniyati chegaralangan.
Matbuot anjumanida, shuningdek, O‘zbekistonda issiqlik tarmoqlarining 60 foizi ta’mirtalab ahvolda ekani ma’lum qilindi.
Respublika bo‘yicha Buxoro (68 foiz), Navoiy (85 foiz), Toshkent (66 foiz) viloyatlari va Toshkent shahrida (100 foiz) markazlashgan issiqlik ta’minoti tizimi mavjud. Mamlakatda faoliyat yuritayotgan 20 ta issiqlik ta’minoti korxonalari balansidagi 500 ta qozonxona ish faoliyatida bo‘lib, ushbu qozonxonalardagi qozonlar ma’nan eskirgan. Mavjud 4500 kilometr issiqlik tarmoqlaridan 2500 kilometr qismi (60 foiz) ta’mirtalab ahvolda, tarmoq yo‘qotishlari esa 40 foizni tashkil etmoqda.
Izoh (0)