28-oktabr kuni Turizm va sport vazirligi huzuridagi Madaniy meros agentligi tashabbusi bilan birinchi marta respublikaning barcha hududlarida “Milliy suvenirlar” festivali tashkil etildi. Bu haqda “Daryo”ga agentlik matbuot xizmati xabar berdi.
Qayd etilishicha, festivalning maqsad va vazifalari ichki va tashqi turizmni jadal rivojlantirish, mamlakat fuqarolari va xorijlik sayyohlar o‘rtasida O‘zbekistonning madaniy-tarixiy merosini keng targ‘ib qilish, respublikaning sayohat va dam olish uchun xavfsiz manzil sifatidagi imijini mustahkamlash borasida olib borilayotgan sa’y-harakatlarga munosib hissa qo‘shishdir.
Shuningdek, festival ishtirokchilari tomonidan yaratilgan milliy suvenirlar savdosini yo‘lga qo‘yish orqali respublika muzeylari va madaniy meros obyektlariga tashrif buyuruvchilar to‘g‘ridan to‘g‘ri ushbu obyektlarning targ‘ibotchisiga aylanadi. Bu esa hududlarni barqaror ijtimoiy-iqtisodiy rivojlantirishga, hunarmandlar bandligini ta’minlashga hamda ularni ham moddiy, ham ma’naviy qo‘llab-quvvatlashga xizmat qiladi.
Festival doirasida hunarmandlarning ko‘rgazma-savdosi, ko‘rik-tanlovlar, mahorat darslari o‘tkazildi, shu bilan birga, folklor-etnografik guruhlar va badiiy jamoalarning chiqishlari tashkil etildi.
- Toshkent shahrida — O‘zbekiston amaliy san’at va hunarmandchilik tarixi davlat muzeyi;
- Qoraqalpog‘iston Respublikasida — Tarixi va madaniyati muzeyi;
- Andijon viloyati tarixi va madaniyati muzeyi;
- Buxoro viloyatida — “Buxoro” davlat muzey-qo‘riqxonasi;
- Jizzax viloyati tarixi va madaniyati davlat muzeyi;
- Toshkent viloyatida — Angren shahar tarixi muzeyi;
- Farg‘ona viloyati tarixi va madaniyati davlat muzeyi;
- Xorazm viloyatida — “Ichan qal’a” davlat muzey qo‘riqxonasi.
- Qashqadaryo viloyatida — “Shahrisabz” davlat muzey-qo‘riqxonasi;
- Samarqand viloyatida — “Samarqand” davlat muzey-qo‘riqxonasi;
- Surxondaryo viloyatida — “Termiz” davlat muzey-qo‘riqxonasi;
- Navoiy viloyati tarixi va madaniyati davlat muzeyi;
- Namangan viloyati tarixi va madaniyati davlat muzeyi;
- Sirdaryo viloyati tarixi va madaniyati davlat davlat muzeylarida bo‘lib o‘tdi.
Festivalning rasmiy ochilish va yopilish marosimi O‘zbekiston amaliy san’at va hunarmandchilik tarixi davlat muzeyida bo‘lib o‘tdi, shuning barobarida “Eng yaxshi suvenir” nominatsiyasi bo‘yicha har bir hudud uchun alohida 1—3 sovrinli o‘rinlar belgilandi va g‘oliblar tadbir so‘ngida munosib taqdirlandi.
Eslatib o‘tamiz, tadbir O‘zbekiston Prezidentining 2021-yil 9-fevraldagi “O‘zbekiston Respublikasida ichki va ziyorat turizmini yanada rivojlantirish chora-tadbirlari to‘g‘risida”gi farmoni asosida o‘tkazildi.
Izoh (0)