Xitoy “Tolibon” harakati Afg‘onistonda faoliyat yuritayotgan terrorchilik tashkilotlaridan uzoqlashib, ularga qarshi kurashda samarali choralar ko‘rishiga umid qilmoqda. Bu haqda Xitoy tashqi ishlar vaziri Van I “Tolibon” tomonidan Afg‘oniston muvaqqat Vazirlar Mahkamasi raisi o‘rinbosari lavozimiga tayinlangan Abdulg‘ani Barodar bilan Qatar poytaxti Dohadagi uchrashuv chog‘ida aytib o‘tdi.
“‘Sharqiy Turkiston islom harakati’ Birlashgan Millatlar Tashkiloti Xavfsizlik kengashi tomonidan xalqaro terrorchi tashkilot sifatida tan olingan. Bu Xitoyning davlat xavfsizligi va hududiy yaxlitligiga chinakam tahdid soladi, shuningdek, Afg‘onistondagi barqarorlik va uzoq muddatli tartibni xavf ostiga qo‘yadi”, — deya Van Ining so‘zlari keltirilgan Xitoy TIV saytida.
“Afg‘oniston toliblari nihoyat ‘Sharqiy Turkiston Islom harakati’ va boshqa terrorchilik tashkilotlari bilan aniq chegara tortadi va ularga qarshi kurashda samarali choralar ko‘radi, deb umid qilamiz va ishonamiz”, — qo‘shimcha qildi Xitoy TIV rahbari.
Xitoy Tashqi ishlar vazirligining 25-oktabr kuni bergan ma’lumotlariga ko‘ra, Xitoy Xalq Respublikasi Davlat kengashi a’zosi tashqi ishlar vaziri Van I 25—26-oktabr kunlari Qatarda rasmiy tashrif bilan bo‘lib, “Tolibon” harakati vakillari bilan uchrashadi.
Ma’lumot uchun: “Sharqiy Turkiston islom harakati” uyg‘urlarning noqonuniy qurolli guruhi bo‘lib, ular Sharqiy Turkistonda mustaqil islom davlatini yaratish va butun Xitoy xalqiga Islomni qabul qildirishni maqsad qilgan. Guruh BMT, Yevropa Ittifoqi va bir qator davlatlarda terrorchilik tashkiloti deya tan olingan.
Izoh (0)