O‘zbekistonga sentabr oyida jami 1,3 mln dollarga 57 ta elektromobil import qilindi

O‘zbekistonga 2021-yilning sentabr oyida xorijdan 57 ta elektromobil import qilingan. Bu haqda Davlat statistika qo‘mitasi ma’lum qildi.

Qayd etilishicha, bu ko‘rsatkich 2021-yilning avgust oyiga nisbatan 12 taga kam.

O‘zbekiston sentabr oyidagi elektromobillar xaridi uchun 1,3 million AQSh dollari sarflagan.

Ma’lumot uchun, Farg‘onada Xitoy kompaniyasi bilan birgalikda elektromobillar ishlab chiqarishni yo‘lga qo‘yish rejalashtirilmoqda. Unga ko‘ra, yiliga 10 ming dona avtomobil ishlab chiqarish quvvatiga ega loyihaning umumiy qiymati 55 million dollarga baholanmoqda. Shundan 43 million dollarni to‘g‘ridan to‘g‘ri xorijiy investitsiyalar tashkil etadi.

Loyiha Xitoyning Hong Kong ZRSC Technology kompaniyasi bilan hamkorlikda amalga oshiriladi.

Rejaga ko‘ra, elektromobillarni ishlab chiqarish 2022-yilning dekabridan yo‘lga qo‘yiladi. Zavodda 100 ta ish o‘rni yaratiladi.

Eslatib o‘tamiz, O‘zbekistonda elektromobillar importi 2020-yilga nisbatan qariyb yetti baravarga oshgan edi.