Uzbekistan Airways 3-noyabrdan boshlab Kiyevga parvozlar sonini oshiradi. Bu haqda kompaniya matbuot xizmati xabar berdi.
Qayd etilishicha, shu kundan boshlab aviaparvozlar haftasiga ikki marotaba — chorshanba va yakshanba kunlari amalga oshiriladi. Bunga qadar parvozlar faqat yakshanba kunlari amalga oshirilar edi.
Mazkur yo‘nalish bo‘yicha aviachiptalar narxi bir tomonga bagajsiz 2 203 229 so‘mdan, bagaj bilan 2 539 315 so‘mdan boshlanadi. Borish va qaytish bo‘yicha aviachiptalar bagajsiz 4 149 045 so‘mdan, bagaj bilan esa 4 771 427 so‘mdan boshlanadi.
Aviachiptalarni aviakompaniyaning rasmiy saytidan, Uzbekistan Airways Sales filialidan yoki aviakompaniya agentlaridan xarid qilish mumkin. Eslatib o‘tamiz, aviakompaniyaning rasmiy sayti orqali aviachipta xarid qilib olayotganda 3 foizli chegirma taqdim etiladi.
Eslatib o‘tamiz, Uzbekistan Airways Toshkent—Kiyev—Toshkent yo‘nalishida parvozlarni amalga oshirishni 2015-yilning may oyida to‘xtatgandi. Kompaniya oradan 6 yil o‘tib, 2021-yil 26-sentabridan ushbu yo‘nalish bo‘yicha aviaqatnovlarni tikladi.
Izoh (0)