Energetika vazirligi shtabi tomonidan 1-oktabrdan 22-oktabrga qadar o‘tkazilgan tadbirlar davomida respublika bo‘yicha tabiiy gazdan 228 ta holatda noqonuniy foydalanib kelinayotgani aniqlangan, deya xabar bermoqda vazirlik matbuot xizmati.
Xususan, 4 million 278 ming kub metr tabiiy gazdan noqonuniy foydalanilgan. Gaz ta’minoti tashkilotlariga yetkazilgan zarar miqdori esa 3 milliard 832 million 900 ming so‘mni tashkil qilgan.
“Ushbu hajmdagi tabiiy gaz hozirgi kunda 427 ming 830 ta xonadonning 1 kunlik iste’molini tashkil qiladi. Boshqacha aytganda, tabiiy gazning bunday hajmi Namangan va Andijon viloyatlaridagi jami aholi xonadonlarining bir kunlik iste’molini tashkil qiladi”, – deyilgan xabarda.
Qayd etilishicha, ushbu noqonuniy foydalanish holatlarining eng ko‘pi Namangan, Toshkent va Xorazm viloyatlariga to‘g‘ri keladi.
Aniqlangan holatga huquqiy baho berish uchun rasmiylashtirilgan hujjatlar huquqni muhofaza qilish organlariga yuborilgan.
Bundan avval O‘zbekiston aholisining tabiiy gazdan qarzdorligi 500 mlrd so‘mdan oshgani, Namangandagi korxona 10 ming xonadonning 1 kunlik iste’moliga teng gazdan noqonuniy foydalangani aniqlangani hamda O‘zbekistonda 2021-yil boshidan buyon qariyb 78 mlrd so‘mlik gaz o‘g‘irlangani haqida xabar berilgandi.
Izoh (0)