Ўзбекистонга сентябрь ойида жами 1,3 млн долларга 57 та электромобиль импорт қилинди

Ўзбекистонга 2021 йилнинг сентябрь ойида хориждан 57 та электромобиль импорт қилинган. Бу ҳақда Давлат статистика қўмитаси маълум қилди.

Қайд этилишича, бу кўрсаткич 2021 йилнинг август ойига нисбатан 12 тага кам.

Ўзбекистон сентябрь ойидаги электромобиллар хариди учун 1,3 миллион АҚШ доллари сарфлаган.

Маълумот учун, Фарғонада Хитой компанияси билан биргаликда электромобиллар ишлаб чиқаришни йўлга қўйиш режалаштирилмоқда. Унга кўра, йилига 10 минг дона автомобиль ишлаб чиқариш қувватига эга лойиҳанинг умумий қиймати 55 миллион долларга баҳоланмоқда. Шундан 43 миллион долларни тўғридан-тўғри хорижий инвестициялар ташкил этади.

Лойиҳа Хитойнинг Hong Kong ZRSC Technology компанияси билан ҳамкорликда амалга оширилади.

Режага кўра, электромобилларни ишлаб чиқариш 2022 йилнинг декабридан йўлга қўйилади. Заводда 100 та иш ўрни яратилади.

Эслатиб ўтамиз, Ўзбекистонда электромобиллар импорти 2020 йилга нисбатан қарийб етти бараварга ошган эди.