Moliya vazirligi tomonidan “O‘zbekiston Respublikasining Soliq kodeksiga o‘zgartirish va qo‘shimchalar kiritish to‘g‘risida”gi qonun loyihasi jamoatchilik muhokamasiga qo‘yildi.
Unga muvofiq, kodeksning 378-moddasida nazarda tutilgan soliq solinmaydigan daromad turlariga qo‘shimcha ravishda soliq to‘lovchining uy-joylarini talabalarga ijaraga berishdan olingan daromadlari ham kiritilmoqda.
Bundan tashqari, hujjat bilan Soliq kodeksining 421-moddasiga 5-band qo‘shish taklif qilinmoqda. Unda yetim bolalar va ota-ona qaramog‘idan mahrum bo‘lgan bolalar mulkidagi mol-mulk soliq solishdan ozod etilishi qayd qilingan.
Mazkur imtiyoz yetim bolalar va ota-ona qaramog‘idan mahrum bo‘lgan bolalarga 18 yoshga to‘lgan yilda davlat budjeti mablag‘lari hisobidan ajratiladigan uy-joylar bo‘yicha ular 23 yoshga to‘lguniga qadar amal qiladi.
483-moddasida qayd etilgan vaqtinchalik soliq imtiyozlariga esa 2022-yil 1-yanvardan 2023-yil 1-yanvarga qadar respublika tumanlarida (Toshkent shahri bundan mustasno) faoliyat yurituvchi yakka tartibdagi tadbirkorlik subyektlari uchun belgilangan ijtimoiy soliq stavkasi BHMning 50 foizi miqdorida qo‘llanilishi kiritilmoqda.
Jamoatchilik muhokamalari 9-noyabrga qadar davom etadi.
Bundan avval Oliy ta’lim vazirligi Toshkent yotoqxonalarida joy yetishmasligi muammosini ikki qavatli karavotlar orqali hal qilish yo‘lini taklif qilgani hamda O‘zbekistonda talabalarga ijara to‘lovining bir qismini qoplab berish tartibi belgilangani haqida xabar berilgandi.
Izoh (0)