Qashqadaryo viloyatining Qarshi shahrida istiqomat qiluvchi aholi vakillari Qarshi—Koson yo‘lida joylashgan terini qayta ishlovchi zavoddan chiqayotgan sizot suvlarning badbo‘yligidan shikoyat qilgandi. Viloyat IIB mas’ullari mazkur muammoga yechim topishga kirishgan.
Bu haqda “Daryo”ga xabar bergan viloyat IIB axborot xizmati rahbari Javlon Baxtiyevning ma’lumot berishicha, IIB xodimlari boshchiligida mutasaddi idora vakillari oqova suvi to‘plangan zaxkashdagi suvlarni olish, zaxkashni ko‘mish ishlariga maxsus texnikalar va buldozerlar jalb etgan.
“Qarshi shahri ‘Shayxali’ mahallasida joylashgan JV Qarshi Leater mas’uliyati cheklangan jamiyatining terini qayta ishlash zavodidan chiqayotgan oqova suvi o‘zidan badbo‘y hid tarqatib, shu atrofda yashovchi fuqarolarning e’tiroziga sabab bo‘lgandi. Viloyat hokimi Zoir Mirzayev ham mazkur hududni ko‘zdan kechirib, muammo viloyat IIB boshlig‘i bilan hamkorlikda hal etilishini bildirgandi. Shundan so‘ng viloyat IIB boshlig‘i topshirig‘i bilan muammoni hal etish ishlari boshlab yuborildi. Tez orada teri zavodi chiqindilari oqova suvi tarmog‘iga ulanib, muammo bartaraf etiladi”, — deydi Javlon Baxtiyev.
Izoh (0)