2021-yilda Toshkent viloyatidagi maktab bitiruvchilarning bor-yo‘g‘i 16 foizi oliygohlarga qabul qilingan. Bu haqda O‘zLiDePdan prezidentlikka nomzod Shavkat Mirziyoyev Toshkent viloyatidagi saylovchilar bilan uchrashuvda ma’lum qildi, deb xabar beradi “Daryo” muxbiri.
Shavkat Mirziyoyevning so‘zlariga ko‘ra, Toshkent viloyatida oliy ma’lumot va toifaga ega bo‘lmagan o‘qituvchilar ulushi 54 foizni tashkil etadi. Bu respublikada eng past ko‘rsatkichlardan biri.
Ta’kidlanishicha, Chirchiq, Nurafshon, Olmaliq, Yangiyo‘l shaharlari, Bekobod, Toshkent va Yangiyo‘l tumanlaridagi 70 foiz maktablar ikki smenada, ayrim maktablar hatto uch smenada ishlamoqda.
“Endi, Toshkent viloyatini maktab ta’limi islohotlarining namunasiga aylantirish bo‘yicha alohida dastur amalga oshiriladi. Avvalambor, Yangi O‘zbekiston ustozlari dasturi amalga oshirilib, ta’lim sifati past 60 ta maktabga boshqa hududlardan kamida 150 nafar malakali o‘qituvchi jalb qilinadi. Ularga maxsus ustama to‘lanadi, 15 million so‘m bir martalik to‘lov beriladi, yashash joyining ijara puli qoplanadi. Keyingi uch yilda 25 ming nafar yoki 70 foiz o‘qituvchilarning malakasi oshirilib, xalqaro va milliy sertifikat olishi ta’minlanadi. Ushbu ishlarga xususiy ta’lim tashkilotlarini ham faol jalb qilinadi”, — deydi davlat rahbari.
“Kelgusi besh yilda budjetdan 20 ta yangi maktab quriladi, 260 tasi rekonstruksiya qilinadi va kapital ta’mirlanadi. Bundan tashqari, Toshkent viloyatidan boshlab maktablarni qurish va foydalanishning yangi tizimi yo‘lga qo‘yiladi. Jumladan, Qibray, O‘rta Chirchiq, Zangiota va Toshkent tumanlarida xususiy kapitalni jalb qilgan holda 12 ta zamonaviy tipdagi maktablar qurilib, foydalanishga topshiriladi. Ushbu maktablar uchun to‘lovlar lizing asosida budjet hisobidan 25 yil davomida amalga oshiriladi”, — deya qayd etadi Shavkat Mirziyoyev.
Eslatib o‘tamiz, shu yilning iyulida Shavkat Mirziyoyev oliy ta’lim muassasalarida ta’lim olish imkoniyatlarini kengaytirishga oid qarorni imzolagan. Shuningdek, O‘zbekistonda “temir daftar”dagi oilalarning har bir farzandiga o‘quv qurollari va maktab formasi sotib olish uchun 500 ming so‘mdan berilishi, O‘zbekistonda OTMga kirishda eng yuqori ball to‘plagan 200 nafar abituriyent uchun Prezident granti joriy etilgani hamda O‘zbekistonda ikki va undan ortiq farzandi to‘lov-shartnoma asosida o‘qiyotgan oilalarga imtiyozli ta’lim krediti berilishi haqida xabar berilgandi.
Izoh (0)