Қашқадарё вилоятининг Қарши шаҳрида истиқомат қилувчи аҳоли вакиллари Қарши—Косон йўлида жойлашган терини қайта ишловчи заводдан чиқаётган сизот сувларнинг бадбўйлигидан шикоят қилганди. Вилоят ИИБ масъуллари мазкур муаммога ечим топишга киришган.
Бу ҳақда «Дарё»га хабар берган вилоят ИИБ ахборот хизмати раҳбари Жавлон Бахтиевнинг маълумот беришича, ИИБ ходимлари бошчилигида мутасадди идора вакиллари оқова суви тўпланган захкашдаги сувларни олиш, захкашни кўмиш ишларига махсус техникалар ва бульдозерлар жалб этган.
«Қарши шаҳри ‘Шайхали’ маҳалласида жойлашган JV Qarshi Leater масъулияти чекланган жамиятининг терини қайта ишлаш заводидан чиқаётган оқова суви ўзидан бадбўй ҳид тарқатиб, шу атрофда яшовчи фуқароларнинг эътирозига сабаб бўлганди. Вилоят ҳокими Зоир Мирзаев ҳам мазкур ҳудудни кўздан кечириб, муаммо вилоят ИИБ бошлиғи билан ҳамкорликда ҳал этилишини билдирганди. Шундан сўнг вилоят ИИБ бошлиғи топшириғи билан муаммони ҳал этиш ишлари бошлаб юборилди. Тез орада тери заводи чиқиндилари оқова суви тармоғига уланиб, муаммо бартараф этилади», — дейди Жавлон Бахтиев.
Изоҳ (0)