Jons Hopkins universiteti ma’lumotlariga ko‘ra, dunyoda koronavirusga chalinganlar soni 239 130 342 kishiga yetdi, shularning 4 873 559 nafari vafot etgan. Shuningdek, jahon bo‘yicha qo‘llanilgan vaksinalar 6,534 milliard dozadan oshdi.
Kasallanganlarning umumiy soni bo‘yicha AQSh (44,6 million), Hindiston (34 million), Braziliya (21,5 million), Buyuk Britaniya (8,3 million), Rossiya (7,7 million) yetakchilik qilmoqda. So‘nggi 4 hafta ichidagi kasallanganlar soni bo‘yicha esa AQSh, Britaniya, Turkiya, Hindiston va Rossiya eng oldinda bormoqda.
JSST dunyoda koronavirusga chalinish va o‘lim holatlari kamayganini ma’lum qildi
Jahon sog‘liqni saqlash tashkiloti (JSST) jahonda bir hafta ichida (4—10-oktabr) COVID-19 ga chalinish bilan bog‘liq yangi holatlar o‘tgan haftaga nisbatan 7 foizga, o‘lim darajasi esa 10 foizga qisqarganini ma’lum qildi. Tashkilot statistikasiga ko‘ra, haftalik ko‘rsatkichlar avgustdan buyon pasayib kelmoqda.4—10-oktabr oralig‘ida 2,8 million kishi kasallanib, 46 mingdan ortiq odam vafot etgan.
Burunga sepiladigan “Sputnik V” ko‘ngillilarda sinaladi
Rossiya Sog‘liqni saqlash vazirligi burunga sepiladigan sprey ko‘rinishidagi “Sputnik V” koronavirusga qarshi vaksinasi sinovlarining ikkinchi bosqichini o‘tkazishga ruxsat berdi.Tadqiqotdan maqsad — voyaga yetgan ko‘ngillilar ishtirokida “Gam-KOVID-Vak” dori preparatining xavfsizligini, qabul qilinuvchanligini va immunogenligini baholashdan iborat. Sinovda 500 nafar ko‘ngilli qatnashadi, uni 2023-yil 31-dekabrgacha yakunlash rejalashtirilgan.
Mavzuga doir: Moskvada “Sputnik V” vaksinasining burunga tomiziladigan shakli va yangi “Sputnik Layt” vaksinasi sinovdan o‘tkaziladi
JSST COVID-ekspertlardan iborat yangi guruhni tuzdi
JSST yangi viruslarni o‘rganib, kelajakda pandemiyalar oldini olish ustida ishlaydigan 26 nafar olimdan iborat ro‘yxatni taqdim etdi. Ular, shuningdek, COVID-19 koronavirusini ham tadqiq qiladi.Guruhga Xitoyning Uxan shahridagi qo‘shma tadqiqotda ishtirok etgan olimlar Marion Kupmans, Tea Fisher, Xung Nguyen va veterinariya bo‘yicha xitoylik ekspert Yan Yungi ham kirdi.
Jamoa virus Uxandagi bozorlarda hayvonlardan odamlarga yuqqani yoki laboratoriyadagi baxtsiz hodisa oqibatida sizib chiqqani versiyalarini ko‘rib chiqadi.
JSST ushbu guruh COVID-19 kelib chiqishini aniqlash borasida “bizning so‘nggi imkoniyatimiz” bo‘lishi mumkin, dedi.
Putin qanday qilib koronavirusga chalinishdan saqlanganini ma’lum qildi
Rossiya prezidenti Vladimir Putin vaksinatsiya tufayli koronavirusga chalinmaslikka muvaffaq bo‘lganini aytdi.“Rossiya energetika haftaligi” forumi doirasida prezidentga “Siz koronavirus yuqtirishdan qo‘rqasizmi?” — degan savol kelib tushdi. “Men koronavirusni yuqtirib olishim mumkin bo‘lgan vaziyatga tushganman, ming afsuski, menga yaqin xodimlarim kasallanib qolgan, men esa ular bilan muloqot qilganman”, — dedi u.
“Ammo bu narsa yuz bermadi, hozir mutaxassislar ishonch bilan aytayotganidek, bu bizning vaksinamiz ‘Sputnik V’ menga bergan himoya tufayli”, — dedi Putin.
Koronavirusga qarshi emlash haligacha boshlanmagan mamlakatlar ma’lum qilindi
JSST bosh direktori Tedros Adanom Gebreyesus dunyoning uchta mamlakatida hali vaksinatsiya boshlanmaganini ma’lum qildi. Bular — Burundi, Eritreya va Shimoliy Koreya.Shuningdek, uning qayd etishicha, 56 ta mamlakat JSST tomonidan qo‘yilgan, sentabr oxirigacha aholining 10 foizini emlash bo‘yicha maqsadga erisha olmagan. Bundan ham ko‘proq mamlakat esa joriy yil so‘ngiga qadar aholining 40 foizini emlash maqsadiga erisholmaslik xavfi ostida turibdi.
“Shuningdek, yana bir guruh mamlakatlar cheklangan imkoniyatlarga ega. Bular beqarorlik, nizolar yoki zo‘ravonlikdan jabr chekkan davlatlardir. JSST va bizning sheriklarimiz bu mamlakatlar bilan hamkorlik qilib, vaksinatsiyani joriy qilish uchun joylarda texnik va logistik salohiyatni mustahkamlash ustida ishlamoqda”, — deyiladi JSST xabarida.
Izoh (0)