Жонс Ҳопкинс университети маълумотларига кўра, дунёда коронавирусга чалинганлар сони 239 130 342 кишига етди, шуларнинг 4 873 559 нафари вафот этган. Шунингдек, жаҳон бўйича қўлланилган вакциналар 6,534 миллиард дозадан ошди.
Касалланганларнинг умумий сони бўйича АҚШ (44,6 миллион), Ҳиндистон (34 миллион), Бразилия (21,5 миллион), Буюк Британия (8,3 миллион), Россия (7,7 миллион) етакчилик қилмоқда. Сўнгги 4 ҳафта ичидаги касалланганлар сони бўйича эса АҚШ, Британия, Туркия, Ҳиндистон ва Россия энг олдинда бормоқда.
ЖССТ дунёда коронавирусга чалиниш ва ўлим ҳолатлари камайганини маълум қилди
Жаҳон соғлиқни сақлаш ташкилоти (ЖССТ) жаҳонда бир ҳафта ичида (4—10 октябрь) COVID-19 га чалиниш билан боғлиқ янги ҳолатлар ўтган ҳафтага нисбатан 7 фоизга, ўлим даражаси эса 10 фоизга қисқарганини маълум қилди. Ташкилот статистикасига кўра, ҳафталик кўрсаткичлар августдан буён пасайиб келмоқда.4—10 октябрь оралиғида 2,8 миллион киши касалланиб, 46 мингдан ортиқ одам вафот этган.
Бурунга сепиладиган «Спутник V» кўнгиллиларда синалади
Россия Соғлиқни сақлаш вазирлиги бурунга сепиладиган спрей кўринишидаги «Спутник V» коронавирусга қарши вакцинаси синовларининг иккинчи босқичини ўтказишга рухсат берди.Тадқиқотдан мақсад — вояга етган кўнгиллилар иштирокида «Гам-КОВИД-Вак» дори препаратининг хавфсизлигини, қабул қилинувчанлигини ва иммуногенлигини баҳолашдан иборат. Синовда 500 нафар кўнгилли қатнашади, уни 2023 йил 31 декабргача якунлаш режалаштирилган.
Мавзуга доир: Москвада «Спутник V» вакцинасининг бурунга томизиладиган шакли ва янги «Спутник Лайт» вакцинаси синовдан ўтказилади
ЖССТ COVID-экспертлардан иборат янги гуруҳни тузди
ЖССТ янги вирусларни ўрганиб, келажакда пандемиялар олдини олиш устида ишлайдиган 26 нафар олимдан иборат рўйхатни тақдим этди. Улар, шунингдек, COVID-19 коронавирусини ҳам тадқиқ қилади.Гуруҳга Хитойнинг Ухань шаҳридаги қўшма тадқиқотда иштирок этган олимлар Марион Купманс, Теа Фишер, Хунг Нгуен ва ветеринария бўйича хитойлик эксперт Ян Юнги ҳам кирди.
Жамоа вирус Ухандаги бозорларда ҳайвонлардан одамларга юққани ёки лабораториядаги бахтсиз ҳодиса оқибатида сизиб чиққани версияларини кўриб чиқади.
ЖССТ ушбу гуруҳ COVID-19 келиб чиқишини аниқлаш борасида «бизнинг сўнгги имкониятимиз» бўлиши мумкин, деди.
Путин қандай қилиб коронавирусга чалинишдан сақланганини маълум қилди
Россия президенти Владимир Путин вакцинация туфайли коронавирусга чалинмасликка муваффақ бўлганини айтди.«Россия энергетика ҳафталиги» форуми доирасида президентга «Сиз коронавирус юқтиришдан қўрқасизми?» — деган савол келиб тушди. «Мен коронавирусни юқтириб олишим мумкин бўлган вазиятга тушганман, минг афсуски, менга яқин ходимларим касалланиб қолган, мен эса улар билан мулоқот қилганман», — деди у.
«Аммо бу нарса юз бермади, ҳозир мутахассислар ишонч билан айтаётганидек, бу бизнинг вакцинамиз ‘Спутник V’ менга берган ҳимоя туфайли», — деди Путин.
Коронавирусга қарши эмлаш ҳалигача бошланмаган мамлакатлар маълум қилинди
ЖССТ бош директори Тедрос Аданом Гебрейесус дунёнинг учта мамлакатида ҳали вакцинация бошланмаганини маълум қилди. Булар — Бурунди, Эритрея ва Шимолий Корея.Шунингдек, унинг қайд этишича, 56 та мамлакат ЖССТ томонидан қўйилган, сентябрь охиригача аҳолининг 10 фоизини эмлаш бўйича мақсадга эриша олмаган. Бундан ҳам кўпроқ мамлакат эса жорий йил сўнгига қадар аҳолининг 40 фоизини эмлаш мақсадига эришолмаслик хавфи остида турибди.
«Шунингдек, яна бир гуруҳ мамлакатлар чекланган имкониятларга эга. Булар беқарорлик, низолар ёки зўравонликдан жабр чеккан давлатлардир. ЖССТ ва бизнинг шерикларимиз бу мамлакатлар билан ҳамкорлик қилиб, вакцинацияни жорий қилиш учун жойларда техник ва логистик салоҳиятни мустаҳкамлаш устида ишламоқда», — дейилади ЖССТ хабарида.
Изоҳ (0)