JSST: COVID-19 ga qarshi kurashda yo‘lning qariyb 60 foizi bosib o‘tildi

Insoniyat tez orada COVID-19 ga qarshi kurashda yo‘lning 60 foizini bosib o‘tadi, lekin oldinda kutilmagan to‘siqlar bo‘lishi mumkin, shuning uchun pandemiya aynan qachon tugashini aytishga hali erta. Bu haqda Jahon sog‘liqni saqlash tashkiloti (JSST) bosh ilmiy xodimi Sumya Svaminatan Shveysariyaning SonntagsBlick gazetasiga bergan intervyusida aytib o‘tdi.

Agar biz pandemiyani marafonga qiyoslasak, insoniyat hozir qaysi bosqichda, degan savolga javob berar ekan, Svaminatan shunday dedi: “Umid qilamanki, biz tez orada yo‘lning 60 foizini bosib o‘tamiz. Ammo yana ko‘plab to‘siqlarni yengishimizga to‘g‘ri kelishi mumkin”.

“Tez orada pandemiyani yengamiz deb aytishga erta, bunday bo‘lmaydi. Buning uchun juda ko‘p narsalar mavhum bo‘lib qolmoqda, shu jumladan, kutilmaganda koronavirusning yangi variantlari paydo bo‘lishi ham”, — dedi Svaminatan.

JSST ilmiy xodimi, shuningdek, dunyoning turli mamlakatlari va mintaqalarida aholini COVID-19 ga qarshi emlash qamrovidagi sezilarli farqqa e’tibor qaratdi. Uning so‘zlariga ko‘ra, ba’zi mamlakatlarda aholining 70-80 foizi emlangan, Afrikada esa emlash darajasi 4 foizga ham yetmaydi. “Biz bu vaziyatga qanchalik jim qarab tursak, koronavirusning yangi variantlari paydo bo‘lishi xavfi shuncha oshadi”, — deya xulosa qildi u.

Sentabr oyining oxirida, rossiyalik epidemiolog Eduard Shunkov hamda “Rospotrebnadzor” markaziy epidemiologiya institutining epidemiologiya va OITSning oldini olish bo‘limi boshlig‘i Vadim Pokrovskiy koronavirus pandemiyasi yaqin orada tugamasligini aytgandi. Shunkovning so‘zlariga ko‘ra, olimlar mutatsion salohiyati yuqori bo‘lgan viruslar qanday tarqalishini tushunib yetsagina, pandemiya yakunining aniq vaqtini oldindan aytish mumkin bo‘ladi. Pokrovskiy, o‘z navbatida, COVID-19 gripp kabi mavsumiy xususiyatga ega bo‘lishini va vaqti-vaqti bilan ba’zi mamlakatlarda qayta boshlanishini aytib o‘tdi.