RT nashri salonida rossiyalik teleboshlovchi Kseniya Sobchak bo‘lgan Mercedes’ning Volkswagen avtomobili bilan to‘qnashuvi aks etgan videolavhalarni e’lon qildi. YTH yo‘lda o‘rnatilgan kuzatuv kameralari tomonidan, shuningdek, hodisadan sal oldin Mercedes quvib o‘tgan mikroavtobusning videokuzatuv tizimi orqali tasvirga olingan.
Kseniya Sobchak yo‘lovchi sifatida o‘tirgan Mercedes S500 haydovchisi quvib o‘tish chog‘ida yo‘lning qarama-qarshi yo‘nalishdagi qismiga o‘tib ketgan va Volkswagen avtomobili bilan to‘qnashgan. Shundan keyin u otilib ketib, mikroavtobusga tegib ketgan. Avtobus yo‘lovchilaridan hech kim jabrlanmagan, faqat bir nechta oyna singan.
YTH 9-oktabr kuni kechqurun Adler — “Alpika Servis” yo‘lida sodir bo‘lgan. Hodisa oqibatida Volkswagen yo‘lovchisi halok bo‘lgan. Mercedes haydovchisi baxtsiz hodisada aybdorligini tan oldi, u uy qamog‘iga joylashtirildi.
Voqea sodir bo‘lganidan keyin Sobchak boshqa mashinaga o‘tirib, aeroportga yo‘l olgan. “Podyom” nashri xabar qilishicha, Mercedes avtomobili Sobchakka tegishli bo‘lmagan, xizmat safarlari chog‘ida u doim mashinalarni mahalliy haydovchi bilan birga ijaraga oladi.
Kseniya Sobchak o‘z Telegram kanaliga YTH haqida post joyladi. Teleboshlovchining so‘zlariga ko‘ra, mashinadagi hech kim haydovchini tez yurishga majbur qilmagan. Sobchakning o‘zi to‘qnashuvdan keyin hushini yo‘qotgan, miyasi chayqalgan va ko‘p sonli shikastlanishlar olgan, shu jumladan, ichki a’zolari jabrlangan. Ammo u “o‘g‘lining yoniga va uyiga shoshgani” sababli kasalxonaga borishdan bosh tortgan.
Sobchak — teleboshlovchi va siyosatchi, 2018-yilda u Rossiya prezidenti saylovida qatnashib, 1,68 foiz ovoz bilan to‘rtinchi o‘rinni egallagan. 2019-yildan buyon “Ehtiyot bo‘ling, Sobchak!” YouTube kanalini yuritib, yangiliklar sharhlari va taniqli shaxslar bilan intervyularni joylab boradi.
Izoh (0)