Farg‘ona viloyatida o‘tgan bir hafta davomida 16 ta yo‘l-transport hodisasi sodir bo‘lgan. Bu haqda viloyat IIB YHXB axborot xizmatiga tayanib “Daryo” muxbiri xabar qildi.
Qayd etilishicha, viloyat IIB YHXB 2021-yilning 4-oktabridan 11-oktabrigacha bo‘lgan vaqt oralig‘ida viloyatda yo‘l harakati qoidalari buzilishi holati bo‘yicha statistik ma’lumotlarni e’lon qilgan.
Ma’lum bo‘lishicha, o‘tgan bir hafta davomida sodir bo‘lgan yo‘l-transport hodisalari oqibatida jami 10 nafar fuqaro vafot etgan. Shuningdek, 7 nafar fuqaro turli darajadagi tan jarohatlarini olgan.
Viloyat IIB YHXB axborotida 4—11-oktabr kunlari yuz bergan 16 ta YTHning aynan nechtasida inson o‘limi bilan bog‘liq holatlar qayd etilganiga aniqlik kiritilmagan.
Viloyat IIB va YHXB tomonidan yuqorida ko‘rsatilgan sanalarda yuz bergan inson o‘limi bilan bog‘liq birorta YTH haqida rasmiy axborot berilmagan.
Qo‘shimcha qilinishicha, 1 hafta ichida 151 nafar haydovchi spirtli ichimlik iste’mol qilgan holda avtoulov boshqargan. Svetoforning taqiqlovchi belgisiga amal qilmagan haydovchilar 302 nafarni tashkil qilgan. 695 ta holatda piyodalar yo‘l harakati qoidalariga amal qilmagan.
Bundan avval O‘zbekistonda 2021-yil boshidan beri sodir bo‘lgan YTHlar oqibatida 1682 kishi halok bo‘lgani, Namanganda o‘zaro to‘qnashgan “Moskvich” va Nexia orasida qolib ketgan 11 yoshli qiz vafot etgani hamda Namanganda otasining Nexia’sini haydab ketib, Matiz bilan to‘qnashgan 14 yoshli bola bir kishining umriga zomin bo‘lgani haqida xabar berilgandi.
Izoh (0)