Фарғона вилоятида ўтган бир ҳафта давомида 16 та йўл-транспорт ҳодисаси содир бўлган. Бу ҳақда вилоят ИИБ ЙҲХБ ахборот хизматига таяниб «Дарё» мухбири хабар қилди.
Қайд этилишича, вилоят ИИБ ЙҲХБ 2021 йилнинг 4 октябридан 11 октябригача бўлган вақт оралиғида вилоятда йўл ҳаракати қоидалари бузилиши ҳолати бўйича статистик маълумотларни эълон қилган.
Маълум бўлишича, ўтган бир ҳафта давомида содир бўлган йўл-транспорт ҳодисалари оқибатида жами 10 нафар фуқаро вафот этган. Шунингдек, 7 нафар фуқаро турли даражадаги тан жароҳатларини олган.
Вилоят ИИБ ЙҲХБ ахборотида 4—11 октябрь кунлари юз берган 16 та ЙТҲнинг айнан нечтасида инсон ўлими билан боғлиқ ҳолатлар қайд этилганига аниқлик киритилмаган.
Вилоят ИИБ ва ЙҲХБ томонидан юқорида кўрсатилган саналарда юз берган инсон ўлими билан боғлиқ бирорта ЙТҲ ҳақида расмий ахборот берилмаган.
Қўшимча қилинишича, 1 ҳафта ичида 151 нафар ҳайдовчи спиртли ичимлик истеъмол қилган ҳолда автоулов бошқарган. Светофорнинг тақиқловчи белгисига амал қилмаган ҳайдовчилар 302 нафарни ташкил қилган. 695 та ҳолатда пиёдалар йўл ҳаракати қоидаларига амал қилмаган.
Бундан аввал Ўзбекистонда 2021 йил бошидан бери содир бўлган ЙТҲлар оқибатида 1682 киши ҳалок бўлгани, Наманганда ўзаро тўқнашган «Москвич» ва Nexia орасида қолиб кетган 11 ёшли қиз вафот этгани ҳамда Наманганда отасининг Nexia’сини ҳайдаб кетиб, Matiz билан тўқнашган 14 ёшли бола бир кишининг умрига зомин бўлгани ҳақида хабар берилганди.
Изоҳ (0)