Жаҳон чемпионатига борадиган Шаҳрам ва Ҳасанбой, 80 талик довондан ўтган Месси, «қизил фурия»ни таслим қилган «учранглилар». Энг сўнгги спорт янгиликлари

Дунё ва ўзбек спортига оид 11 октябрь кунининг энг муҳим хабарлари дайжести билан танишинг.

Ўзбекистон

Тошкентда триатлон бўйича Осиё Кубоги ўтказилди

Тошкентда триатлон бўйича Осиё Кубогининг асосий йўналишида ғолиб ва совриндорлар аниқланди.

Мусобақа регламентга кўра, 750 метрга сузиш, 20 км велопойга ва 5 км югуриш дастурида ўтказилди. Ғолиб ва совриндорлар рўйхати қуйидаги кўриниш олди:

Эркаклар:

• 1. Бадр Сиване (Марокаш) – 55:32
• 2. Матцей Бруздяк (Польша) – 55:36
• 3. Витали Воронсов (Украина) – 55:41

• 1. Паулина Климас (Польша) – 1:01.16
• 2. Ева Даниелс (Люксембург) – 1:01.44
• 3. Лиза Бергер (Швейцария) – 1:01.42.

Россиянинг Москва шаҳрида 7—10 октябрь кунлари от спортининг конкур йўналиши бўйича Евросиё Кубоги бўлиб ўтди. Унда Ўзбекистон терма жамоаси спортчилари муваффақиятли иштирок этди.

Мусобақа якунларига кўра, Бекзод Қурбонов «Кинг Cornэт Л» лақабли оти билан турнирнинг мутлақ чемпионига айланди, Умид Камилов эса «Неро Уно Рафаэл» лақабли отда кумуш медалини қўлга киритди. Яна бир чавандоз Аъзам Толиббоев эса ўзининг «Ладй» лақабли отида тўртинчи ўринни банд этди.

Ўзбекистон терма жамоасининг Жаҳон чемпионатига борадиган таркиби маълум бўлди

Ўзбекистон бокс терма жамоасининг Белград (Сербия) шаҳрида 26 октябрдан 6 ноябрга қадар бўлиб ўтадиган Жаҳон чемпионатида иштирок этадиган таркиби маълум бўлди.

Мусобақада 13 хил вазн тоифасида жанглар ўтказилади. Ўзбекистон терма жамоаси ушбу турнирга тўлиқ таркиб билан йўл олади.

Туризм ва спорт вазирлиги матбуот хизматининг ёзишича, қуйидаги жангчилар Ўзбекистон номидан жаҳон биринчилигида қатнашади: Шаҳрам Ғиёсов, Нодиржон Мирзаҳмедов, Шаҳобиддин Зоиров, Ҳасанбой Дўстматов, Миразизбек Мирзахалилов, Абдумалик Ҳалоков, Мужибулло Турсунов, Асадхўжа Мўйдинхўжаев, Саиджамшид Жаъфаров, Одилжон Аслонов, Шоҳжаҳон Абдуллаев, Мадиёр Саидраҳимов, Лазизбек Муллажонов.

Месси терма жамоада 80 лик довондан ўтди

Лионель Месси Аргентина терма жамоасининг ЖЧ—2022 саралаши доирасида Уругвайга қарши ўйинда (3:0) гол урди.

Бу Месси учун Аргентина терма жамоасидаги 80-гол бўлди. Шу тариқа «ПСЖ» футболчиси Жанубий Америка минтақаси терма жамоалари футболчилари орасида ушбу кўрсаткичга эришган биринчи ўйинчига айланди. Иккинчи ўринда бораётган Пеленинг (Бразилия) ҳисобида 77 та гол бор.

Шунингдек, 34 ёшли аргентиналик ҳужумчи терма жамоа сафида 80 та гол уришга эришган дунёдаги бешинчи футболчига айланди. Унгача бу ишни Криштиану Роналду (Португалия, 112 та гол), Али Дайи (Эрон,109), Мохтар Даҳари (Малайзия, 89) ва Ференс Пушкаш (Венгрия, 84) уддалаган.

Бускетс Миллатлар Лигасининг энг яхши ўйинчиси деб топилди

Испания терма жамоаси ярим ҳимоячиси Серхио Бускетс Миллатлар Лигаси ҳал қилувчи ўйинларининг энг яхши футболчиси деб топилди.

«Барселона» футболчиси ярим финал ва финал ўйини натижаларига кўра мукофотга лойиқ кўрилди.

33 ёшли ярим ҳимоячи Италия (2:1) ва Францияга (1:2) қарши ўйинларни тўлиқ ўтказди, финалда эса Микель Ойарсабалнинг голига ассистентлик қилди.

Бензема Франция терма жамоаси билан илк совринини қўлга киритди

Ҳужумчи Карим Бензема Франция билан Миллатлар Лигасида ғолиб чиқиб, терма жамоадаги дастлабки совринини қўлга киритди.

Бу унинг фаолиятидаги 26-соврин бўлди. Бунгача Бензема «Лион» билан 7 та, «Реал» билан эса 18 та совринга эга чиққанди.

Франция Жаҳон Чемпионати, Европа чемпионати ва Миллатлар Лигасида ғалаба қозонган илк терма жамоа

Франция терма жамоаси Миллатлар Лигаси финалида Испанияни мағлуб этиб, мусобақа ғолиблигини қўлга киритди.

Шу тариқа «учранглилар» учта халқаро турнир — Жаҳон Чемпионати (1998, 2018), Европа чемпионати (1984, 2000) ва Миллатлар Лигасида ғолиб бўлган биринчи жамоага айланди. Умуман олганда эса Франция ушбу мусобақаларда умумий ҳисобда беш марта ғалаба қозонган.