“Falonchining bolasi, pistonchining haydovchisi ekan deb yuraversak, inqirozdan chiqmaymiz” — senator O‘zbekistonda yo‘l harakati xavfsizligi sohasidagi qonunsizliklar haqida

Yo‘l harakati xavfsizligi sohasida qoidabuzarliklar, xususan, inson o‘limi bilan bog‘liq yo‘l-transport hodisalari kamayishi uchun sohada jamoatchilik nazoratini kuchaytirish lozim, ayni vaqtda yo‘l infratuzilmasini ham yaxshilash kerak. Bu haqda senator Botir Matmuratov “Daryo” muxbiri bilan suhbatda ta’kidlab o‘tdi.

So‘nggi oylarda yo‘l harakati xavfsizligini ta’minlashga mas’ul idoralarning ushbu vazifaga loyiqligini shubha ostida qoldiruvchi bir necha hodisa ro‘y berdi. Jumladan, Olmaliq shahridagi reyd vaqtida qoidabuzarligi uchun to‘xtatilgan Malibu avtomobili YPX xodimiga yuqori turuvchi mas’ul tomonidan berilgan buyruq sabab hech bir chora ko‘rilmay qo‘yib yuborilgani jamoatchilikning keskin noroziligiga sabab bo‘ldi.

Bundan avval ham bir qator YPX xodimlarining taniqli avtoblogerlarni, ular yo‘l harakati qoidalarini buzib harakatlanayotgan bo‘lsa-da, to‘xtatgach, ularni tanib, hech qanday chora ko‘rmay qo‘yib yuborishi bilan bog‘liq bir necha holatlar qayd etilgan edi. Senator Botir Matmuratovning fikricha, yo‘l harakati qoidalarini buzgan va yo‘l-transporti hodisasini sodir etganlar, kim bo‘lishidan qat’i nazar, jazolanishi lozim.

Yarim kechasi baland ovoz chiqarib, juda tez harakatlanayotgan mashinalarni ko‘rib, ‘bizda huquq-tartibot organlari bormi o‘zi?’, deya hayron qolaman. Ming afsuski, huquqni muhofaza qiluvchi organlarning ayrim prinsipsiz xodimlari o‘zicha kattakon va boyvachchalarning bolalarini tartibga chaqirishdan qo‘rqadi.

Ko‘chaga radar qo‘y, kamera qo‘y — kim qonun-qoidani buzayotganini topib olasan. Qo‘rqib ish qiladigan bo‘lsang, senga ishonib topshirilgan sohaning o‘zi rasvo bo‘ladi. Agar qo‘lingdan kelmasa, jamoatchilikni chaqir. Internetga chiqib ketsin — tanqiddan odam uyaladi. Ko‘rdik-ku, bolasining yomon ishlari uchun hokim “qamchilab” qo‘yildi-ku.

Falonchining bolasi ekan, pistonchining haydovchisi ekan deb yuraversak, bizda bu masalada inqiroz bo‘laveradi. Afsuski, biz loqaydlik qilyapmiz.

Botir Matmuratov, senator

Senatorning qayd etishicha, oqibati ayanchli yo‘l-transport hodisalarining ko‘payishida ayrim hollarda talabga javob bermaydigan yo‘l infratuzilmasining ham o‘ziga yarasha o‘rni bor. Masalan, yo‘llarning nosoz qismlarini aylanib o‘tishga urinib, haydovchi qarama-qarshi qatnov qismiga chiqib ketishi oqibatida yuz berayotgan YTHlar ham kam emas; ayni vaqtda ayrim haydovchilar o‘z qoidabuzarliklarini ham aynan yo‘llarning sifatsizligi bilan bog‘laydi.

Ba’zi yo‘llar juda yomon ahvolda ekani haqida internetdan ko‘rib, o‘qib turibmiz. Nafaqat o‘z fuqarolarimiz, balki chet ellik haydovchilar ham yo‘llarimiz talabga javob bermasligi haqida gapiryapti — bu uyaladigan holat.

Ayrim yo‘llarni borib ko‘ring, yamaydigan qancha joyi bor — yo‘l ta’mirlovchilar chala ish qiladi. Yo‘llarini qurish, yo‘l belgilarini saqlash masalasida qat’iy intizom o‘rnatilishi, bu masala jamoatchilik nazoratida bo‘lishi lozim. Kerak bo‘lsa, parlament nazoratida bo‘lsin.

Botir Matmuratov, senator

Ma’lumot uchun, Yo‘l harakati xavfsizligi bosh boshqarmasi o‘tgan hafta bundan uch oy avval Toshkentning markaziy ko‘chalarida sodir etilgan va ijtimoiy tarmoqlarda shov-shuvlarga sabab bo‘lgan qo‘pol qoidabuzarliklarning ishtirokchilari topilgani, shuningdek, oxirgi ikki yil ichida rekord darajada ko‘p qoidabuzarlik sodir etgan qora Gentra haydovchisi aniqlangani haqida xabar berdi.