Toshkent shahrida o‘tkazilgan tungi reydlarning birida qoidabuzar haydovchi YPX xodimlarining qonuniy talablariga bo‘ysunmasdan, janjal ko‘tardi. Holat tasvirlangan lavha UzReport telekanali orqali efirga uzatilgan.
Kadr: Telegram
Ma’lum qilinishicha, poytaxtning Uchtepa tumanida yo‘l-harakati qoidalarini buzgan Nexia-3 to‘xtatilgan. Biroq mashinani boshqarib ketayotgan haydovchi ayol YPX xodimlarining qonuniy talabini bajarmasdan, harakatlanishda davom etgan. Xodimlar tomonidan tadbir o‘tkazilib, qoidabuzar to‘xtatilgan.
Biroq haydovchi o‘zining hujjatlarini taqdim etmasdan, “ukam” deya tanishtirgan yonidagi shaxs bilan holatni tasvirga olayotgan operatorga qarshilik ko‘rsatgan.
“Men ‘zamministr’ning ikkinchi xotini bo‘laman. Hozir telefon qilaman, mana shu kamerangiz uchun javob berasiz”, — deya ayol YPX xodimiga hujjatlarini taqdim etmagan. Uning yonidagi fuqaro esa operator va YPX xodimlariga qo‘pollik qilib, kuch ishlatgan. Yordamga yetib kelgan tezkor xodimlar zo‘ravon yigitni ichki ishlar idorasiga olib ketgan.
Avvalroq Olmaliqda YPX xodimi “25 marta radarga to‘lagan” qoidabuzar ayolni “Abdurazzoq aka”dan bo‘lgan qo‘ng‘iroq sabab qo‘yib yuborgani to‘g‘risida xabar berilgandi.
