«Фалончининг боласи, пистончининг ҳайдовчиси экан деб юраверсак, инқироздан чиқмаймиз» — сенатор Ўзбекистонда йўл ҳаракати хавфсизлиги соҳасидаги қонунсизликлар ҳақида

Йўл ҳаракати хавфсизлиги соҳасида қоидабузарликлар, хусусан, инсон ўлими билан боғлиқ йўл-транспорт ҳодисалари камайиши учун соҳада жамоатчилик назоратини кучайтириш лозим, айни вақтда йўл инфратузилмасини ҳам яхшилаш керак. Бу ҳақда сенатор Ботир Матмуратов «Дарё» мухбири билан суҳбатда таъкидлаб ўтди.

Сўнгги ойларда йўл ҳаракати хавфсизлигини таъминлашга масъул идораларнинг ушбу вазифага лойиқлигини шубҳа остида қолдирувчи бир неча ҳодиса рўй берди. Жумладан, Олмалиқ шаҳридаги рейд вақтида қоидабузарлиги учун тўхтатилган Malibu автомобили ЙПХ ходимига юқори турувчи масъул томонидан берилган буйруқ сабаб ҳеч бир чора кўрилмай қўйиб юборилгани жамоатчиликнинг кескин норозилигига сабаб бўлди.

Бундан аввал ҳам бир қатор ЙПХ ходимларининг таниқли автоблогерларни, улар йўл ҳаракати қоидаларини бузиб ҳаракатланаётган бўлса-да, тўхтатгач, уларни таниб, ҳеч қандай чора кўрмай қўйиб юбориши билан боғлиқ бир неча ҳолатлар қайд этилган эди. Сенатор Ботир Матмуратовнинг фикрича, йўл ҳаракати қоидаларини бузган ва йўл-транспорти ҳодисасини содир этганлар, ким бўлишидан қатъи назар, жазоланиши лозим.

Ярим кечаси баланд овоз чиқариб, жуда тез ҳаракатланаётган машиналарни кўриб, ‘бизда ҳуқуқ-тартибот органлари борми ўзи?’, дея ҳайрон қоламан. Минг афсуски, ҳуқуқни муҳофаза қилувчи органларнинг айрим принципсиз ходимлари ўзича каттакон ва бойваччаларнинг болаларини тартибга чақиришдан қўрқади.

Кўчага радар қўй, камера қўй — ким қонун-қоидани бузаётганини топиб оласан. Қўрқиб иш қиладиган бўлсанг, сенга ишониб топширилган соҳанинг ўзи расво бўлади. Агар қўлингдан келмаса, жамоатчиликни чақир. Интернетга чиқиб кетсин — танқиддан одам уялади. Кўрдик-ку, боласининг ёмон ишлари учун ҳоким «қамчилаб» қўйилди-ку.

Фалончининг боласи экан, пистончининг ҳайдовчиси экан деб юраверсак, бизда бу масалада инқироз бўлаверади. Афсуски, биз лоқайдлик қиляпмиз.

Ботир Матмуратов, сенатор

Сенаторнинг қайд этишича, оқибати аянчли йўл-транспорт ҳодисаларининг кўпайишида айрим ҳолларда талабга жавоб бермайдиган йўл инфратузилмасининг ҳам ўзига яраша ўрни бор. Масалан, йўлларнинг носоз қисмларини айланиб ўтишга уриниб, ҳайдовчи қарама-қарши қатнов қисмига чиқиб кетиши оқибатида юз бераётган ЙТҲлар ҳам кам эмас; айни вақтда айрим ҳайдовчилар ўз қоидабузарликларини ҳам айнан йўлларнинг сифатсизлиги билан боғлайди.

Баъзи йўллар жуда ёмон аҳволда экани ҳақида интернетдан кўриб, ўқиб турибмиз. Нафақат ўз фуқароларимиз, балки чет эллик ҳайдовчилар ҳам йўлларимиз талабга жавоб бермаслиги ҳақида гапиряпти — бу уяладиган ҳолат.

Айрим йўлларни бориб кўринг, ямайдиган қанча жойи бор — йўл таъмирловчилар чала иш қилади. Йўлларини қуриш, йўл белгиларини сақлаш масаласида қатъий интизом ўрнатилиши, бу масала жамоатчилик назоратида бўлиши лозим. Керак бўлса, парламент назоратида бўлсин.

Ботир Матмуратов, сенатор

Маълумот учун, Йўл ҳаракати хавфсизлиги бош бошқармаси ўтган ҳафта бундан уч ой аввал Тошкентнинг марказий кўчаларида содир этилган ва ижтимоий тармоқларда шов-шувларга сабаб бўлган қўпол қоидабузарликларнинг иштирокчилари топилгани, шунингдек, охирги икки йил ичида рекорд даражада кўп қоидабузарлик содир этган қора Gentra ҳайдовчиси аниқлангани ҳақида хабар берди.