Toshkentda bitta avtomashinaga uch xil raqamni almashtirib taqib, 2 yil davomida 60 dan ortiq qoidabuzarlik sodir etgan haydovchi ushlandi. Bu haqda “Toshkent” telekanalining “Tezkor xabarlar” dasturida ma’lum qilindi.
Qayd etilishicha, 6-oktabr kuni Chilonzor tumani Beshyog‘och ko‘chasida 01 007 SSS raqamli qora Gentra YPX inspektorlari tomonidan shubha ostiga olingan. Raqamni planshet orqali tekshirilganda IIV YHXBB ro‘yxatida yo‘qligi ma’lum bo‘lgan.
Transport vositasini ko‘zdan kechirish jarayonida avtoulovning old yon va orqa oynalari maxsus ruxsatnomasiz qoraytirilgani, bundan tashqari ichki tomonidan old oynasining tepa qismida va old panelida “migalka” hamda tovush kuchaytiruvchi karnay o‘rnatilgani aniqlangan.
Voqea joyiga yetib borgan tezkor tergov guruhi tomonidan olib borilgan surishtiruv natijasida fuqaro Sh.F. mashinani soxta raqam bilan boshqarib kelgani ma’lum bo‘lgan. Haydovchidan ushbu avtomobilga tegishli bo‘lgan raqamni taqdim etish so‘ralganda haydovchi Gentra’da boshqa (ikkinchi) davlat raqam belgisi va transport vositasini qayd etish guvohnomasini olib ko‘rsatgan. Taqdim etilgan hujjatga asosan kuzov va dvigatelga solishtirilganda ushbu davlat raqam belgisi bu mashinaga tegishli emasligi, mashinaning asl davlat raqami boshqa (uchinchi) raqam ekani va u onasiga tegishli ekanligi aniqlangan.
Haydovchi javobgarlikdan qochish maqsadida ichki ishlar xodimlariga yolg‘on ma’lumot bergan. Haydovchidan surishtiruv davomida taqdim etgan avtoraqam tegishli bo‘lgan transport vositasi qayerda ekanligi so‘ralganda mashina uyida ekanligini aytgan. Xonadoniga borib Lacetti rusumli transport vositasi tegishli hujjatlar bilan solishtirilganda haydovchi surishtiruv davomida taqdim etgan avtomobil raqami haqiqatan ham Lacetti’ga tegishliligi aniqlangan.
Ma’muriy amaliyot bo‘limidan tekshirilganda Lacetti’da 60 kun muddatdan o‘tgan 30 dan ortiq yo‘l harakati qoidalari buzilishi bilan bog‘liq jarimalar mavjudligi hamda qidiruvda ekanligi ma’lum bo‘lgan va mashina jarima maydoniga joylashtirilgan.
Bundan tashqari, haydovchining onasiga tegishli bo‘lgan transport vositasida ham 60 kundan o‘tgan bir nechta qoidabuzarlik bilan bog‘liq to‘lanmagan jarimalari mavjudligi, aynan shu transport vositasiga soxta raqam taqib yurgani aniqlangan va ushbu mashina ham jarima maydoniga joylashtirilgan.
Qora rangli Lacetti’ning faqatgina orqa yon oynalarini “tonirovka” qilib haydash uchun ruxsatnomasi borligi sababli haydovchi ushbu davlat raqamini ikkinchi mashina, ya’ni Gentra’ga taqib yurgan, vaholanki ushbu transport vositasi oynalarining tusini o‘zgartirishga ruxsatnoma bo‘lmagan.
Bundan tashqari, haydovchi soxta raqamni uch kun avval Moskvada yasattirib kelganini aytgan bo‘lsa-da, aslida soxta 01 777 SSS raqami 2021-yilning sentabr oyida ham Toshkent ko‘chalarida harakatlangani kuzatuv kameralarida qayd etilgan.
Hozirda soxta 01 007 SSS raqami bo‘yicha Toshkent IIBB ekspert kriminalistika markazi tomonidan ekspertiza tekshiruvlari o‘tkazilmoqda.
Haydovchiga nisbatan esa Ma’muriy javobgarlik to‘g‘risidagi kodeksning 126-moddasi, ya’ni transport vositasining oynasining tusini ruxsatnomasiz qoraytirish; 125-modda, ya’ni miltillovchi chiroqlar hamda tovush kuchaytiruvchi karnay (sirena)ni noqonuniy o‘rnatish bilan tegishli hujjatlar rasmiylashtirilgan.
Shuningdek, Toshkent shahar IIBB huzuridagi tergov boshqarmasi tomonidan avto-mototransport vositalari davlat raqamlarini qalbakilashtirish hamda undan foydalanish holati yuzasidan jinoyat ishi qo‘zg‘atilgan. Hozirda dastlabki tergov harakatlari olib borilmoqda.