Olmaliqda YPX xodimi “25 marta radarga to‘lagan” qoidabuzar ayolni “Abdurazzoq aka”dan bo‘lgan qo‘ng‘iroq sabab qo‘yib yubordi
“Toshkent” telekanalining “Poytaxt yo‘llarida” ko‘rsatuvida xizmat vazifasini olib borayotgan YPX xodimi bilan sodir bo‘lgan yana bir lavha ijtimoiy tarmoqlarda tarqaldi. Bu safar qoidabuzar Malibu’ni to‘xtatgan inspektor telefon qo‘ng‘irog‘i sabab haydovchini qo‘yib yuborishga majbur bo‘lgan.
Videodan ko‘rish mumkinki, Toshkent viloyati Olmaliq shahrida xizmat olib borayotgan YPX xodimi avtomobilni boshqarish vaqtida telefonda gaplashgan Malibu-2 avtomobilini to‘xtatgan. Qizil rangli mashinani boshqarib kelayotgan ayol telefonda gaplashmaganini, hozirgacha 25 marta radar uchun jarima to‘laganini aytib, YPX inspektoridan dalolatnoma tuzmaslikni so‘ragan.
“Beshta bolam bo‘lsa, ularni boqaymi yoki jarima to‘laymi… Yolg‘iz ayol bo‘lsam… Bir yil deganda zo‘rga 25 ta radarni to‘ladim”, — degan ayol. Inspektor dalolatnomani rasmiylashtirish vaqtida ayol o‘z telefonini uzatib, uni Abdurazzoq ismli shaxs so‘rayotganini aytgan. Telefonda gaplashgan YPX xodimi go‘shakning nargi tarafidagi shaxsga “xo‘jayin” deya murojaat qilib, qoidabuzar haydovchiga harakatlanishni davom ettirishga ruxsat bergan.
Ta’kidlash kerakki, 2-avgust kuni ijtimoiy tarmoqlarda “Poytaxt yo‘llarida” ko‘rsatuvining yana bir lavhasi keng tarqalgan edi. Unda ham Malibu’ni to‘xtatgan YPX xodimi ratsiya orqali bo‘lgan buyruq sabab qoidabuzarni qo‘yib yuborishga majbur bo‘lgan.
Mavzuga doir:
