Хитой Халқ Республикаси (ХХР) раиси Си Цзиньпин мамлакатда монархиянинг ағдарилишига сабаб бўлган Синьхай инқилобининг 110 йиллиги муносабати билан нутқ сўзлар экан, Хитой ва Тайванни бирлаштириш кераклигини айтди.
BBC хабарига кўра, Си Цзиньпин бирлашиш тинч йўл билан амалга оширилиши кераклигини таъкидлаган. Шу билан бирга, у Хитой халқи айирмачиликка қарши курашда катта тажриба тўплаганини қайд этди.
«Ватанимизни бирлаштиришни якунлаш борасидаги тарихий мақсад амалга ошиши лозим, у, албатта, амалга ошади», — деди Хитой раҳбари. Си Цзиньпин Гонконг сингари «бир мамлакат, икки тизим» тамойили бўйича тинч йўл билан бирлашиш истагида эканини таъкидлади. Бунга жавобан Тайвань расмийлари орол келажаги унда яшовчи аҳолининг хоҳиш-истагига боғлиқлигини билдирди.
Тайвань гарчи ўзини мустақил деб ҳисобласа-да, расмий равишда ХХР таркибига киради. BBC хабарига кўра, охирги бир ҳафта мобайнида Хитой ҳарбий самолётлари Тайваннинг ҳаво ҳужумига қарши мудофаа зонасидан камида 150 марта учиб ўтган.
Аввалроқ The Wall Street Journal АҚШ махсус операция кучлари ва Денгиз пиёдалари корпуси контингенти Тайванда маҳаллий қўшинларни махфий равишда ўқитаётгани ҳақида хабар берганди. Таъкидланишича, АҚШ махсус операция кучларининг 20 га яқин ходими Тайвань қуруқлик қўшинларининг кичик гуруҳини шуғуллантирмоқда. Денгиз пиёдалари, ўз навбатида, маҳаллий денгиз флоти билан ишлаяпти. Нашр манбасининг аниқлик киритишича, АҚШ ҳарбийлари Тайванда камида бир йилдан буён бўлиб турибди.
Оқ уй ва Пентагон Тайванда АҚШ ҳарбийлари борлиги ҳақидаги маълумотга изоҳ беришдан бош тортган.
Изоҳ (0)