Amerikaning Time jurnali, Facebook va boshqa bir qator servislardagi global uzilishlardan so‘ng kompaniya asoschisi Mark Sukerbergning suratini o‘z muqovasiga joylashtirdi. Surat ustida tasdiqlash oynasi ko‘rsatilgan. Unda “Facebook o‘chirilsinmi?” savoli hamda unga javob tariqasida “Chiqish” va “O‘chirish” variantlari taklif etilgan.
Nashrning ushbu muqova bilan chop etilgan sonida amerikalik tadbirkor va sarmoyador Rojer Maknamining mualliflik kolonkasi ham chiqarilgan. Unda u Facebook “o‘zini o‘zi tuzatmaydi”, deb bahs yuritadi va yechim sifatida uchta chora taklif qiladi — maxsus tartibga solish organini yaratish, foydalanuvchilarning maxfiy ma’lumotlaridan foydalanishni taqiqlash va AQShning monopoliyaga qarshi qonunlarini yangilash.
Facebook, WhatsApp, Instagram va bir qator Google servislari 4-oktabr kuni bir necha soat ishlamay qoldi. Downdetector portali buni tarixdagi eng yirik uzilishlar deb atadi. Servis ma’lumotlariga ko‘ra, muammo haqida unga dunyo bo‘ylab 10,6 milliondan ortiq xabar kelib tushgan.
Facebook xabariga ko‘ra, uzilishlar magistral router konfiguratsiyasini o‘zgartirish bilan bog‘liq. Kompaniya muhandislari Facebook ma’lumotlar markazlari o‘rtasida trafikni taqsimlaydigan router konfiguratsiyasini o‘zgartirishda xatolikka yo‘q qo‘ygan, bu aloqa uzilishiga olib kelgan, natijada “domino effekti bo‘yicha ma’lumotlar markazlari o‘rtasidagi aloqa ham uzilgan”.
Uzilishdan so‘ng Sukerberg voqea uchun uzr so‘radi. Tarmoqdagi muammolar fonida Sukerbergning boyligi 4-oktabr kuni kechqurun 6 milliard dollarga kamayib, 116,4 milliard dollargacha tushib ketdi, Facebook aksiyalari esa 5 foizga arzonlashdi.
Uzilishlar fonida AQShda Facebook’ning faoliyati bilan bog‘liq masalalar faol muhokama qilina boshladi. Xususan, Facebook’ning sobiq menejeri Frenses Xaugen Senatdagi chiqishida kompaniya tizimli ravishda foydalanuvchilar xavfsizligidan ko‘ra daromadni birinchi o‘ringa qo‘yishini va jamiyatga ko‘rsatayotgan ta’siriga unchalik ahamiyat bermasligini aytdi. Uning fikricha, ijtimoiy tarmoq bolalarga zarar yetkazadi, ularda o‘z tanalariga nisbatan salbiy hisni shakllantiradi.
Sukerberg ayblovlarga izoh berar ekan, Facebook foydalanuvchilarining xavfsizligi, farovonligi va ruhiy salomatligi kabi muammolar haqida “chuqur qayg‘urishini” aytdi. Shuningdek, u Facebook’ning bolalar uchun ota-ona nazorati va ko‘plab himoya mexanizmlari bilan ta’minlanadigan versiyasi borligini eslatdi.
Mavzuga doir:
Izoh (0)